https://innews.az/uploads/news/2026-03/_innews_9e0cb4ab097630d76ae713f22_o.jpg
Azərbaycan Dövlət Pedaqoji Universitetinin (ADPU) magistratura təhsilini Bakı Dövlət Universitetinin (BDU) Fizika fakültəsində davam etdirməyi planlaşdıran tələbələrinin fakültə ilə tanışlığı təşkil olunub.
Fizika fakültəsinin dekanı Bəxtiyar Paşayev ADPU tələbələrinə fakültənin tarixi, tədrisin və elmi fəaliyyətin təşkili, əldə olunan nailiyyətlər barədə ətraflı məlumat verib.
Tələbələr fakültənin tədris laboratoriyalarında olub, bakalavriat səviyyəsində icra olunan laboratoriya işləri və magistratura səviyyəsində dissertasiya mövzuları üzrə aparılan tədqiqatlarla tanış olublar. Professorlar Vaqif Salmanov, Rəna Qasımova, Sacidə Əbdülvahabova, dosentlər Rəhim Rəhimov və Xıdır Mikayılov fakültədə aparılan elmi-tədqiqat istiqamətləri, magistratura səviyyəsində müxtəlif ixtisaslaşmalar üzrə tədrisin xüsusiyyətləri barədə məlumat veriblər. Qonaqlar Fizika fakültəsində “Elm günü”nə həsr olunmuş seminarda iştirak ediblər.
Görüş çərçivəsində tələbələr BDU-nun Tələbə Elmi-Texniki Yaradıcılıq Mərkəzi, Faydalı qazıntılar muzeyi, “Eko Məkan”la da tanış olublar.
