https://innews.az/uploads/news/2026-04/_innews_5f8d28c3f3a4f1cc60d744fc6_o.jpg
Azərbaycan Dövlət Pedaqoji Universitetinin (ADPU) ADPU Quba filialında Vətən müharibəsi şəhidi, kapitan Aqil Məlikovun xatirəsinə həsr olunmuş “Vətənə sədaqətin və hərbi səfərin rəmzi olan həyat Şəhid kapitan Aqil Məlikovun qəhrəmanlıq yolu” adlı anım tədbiri keçirilib.
Tədbirdə Quba filialının direktoru professor Yusif Alıyev, Quba Rayon İcra Hakimiyyəti başçısının müavini – Ərazi-təşkilat və ictimai-siyasi məsələlər şöbəsinin müdiri Səidə Abasova, YAP Quba rayon təşkilatının sədri Fidan Hüseynova, Quba rayon Heydər Əliyev Mərkəzinin direktoru Sevinc Səlimova, rayonun hüquq-mühafizə orqanlarının rəhbərləri, AYB-nin Quba bölməsinin sədri, şair Ramiz Qusarçaylı, RİH başçısı aparatının məsul şəxsləri, Quba bələdiyyəsinin sədri Allahverdi Xudaverdiyev, Quba Təhsil Sektorunun məsul əməkdaşı Nərmin Bilalova, məktəb direktorları, QİAD Quba İB-nin üzvləri, ADPU-nun Quba filialının rəhbərliyi və kollektivi, şəhid ailələri, qazilər və rayon ictimaiyyətinin nümayəndələri iştirak ediblər.
Tədbir iştirakçıları və şəhidin ailə üzvləri əvvəlcə filialda şəhid kapitan Aqil Məlikovun adını daşıyan auditoriyanı ziyarət ediblər.
Açılış nitqi ilə çıxış edən filialın direktoru professor Yusif Alıyev şəhid kapitan Aqil Məlikovun və ümumilikdə Vətən uğrunda canlarını fəda etmiş bütün şəhidlərimizin şərəfli ömür yolundan bəhs edib. Professor Aqil Məlikovun hərbi fəaliyyətinə toxunaraq, onun qəhrəmanlıqla dolu qısa, lakin mənalı həyat yolunu diqqətə çatdırmış, 44 günlük Vətən müharibəsinin ilk şəhidlərindən biri kimi düşmənin keçilməz hesab olunan Ohanyan səddinin yarılmasında göstərdiyi igidlikdən və Zəfərə aparan yolda şərəflə şəhadətə yüksəlməsindən söz açıb. Direktor qeyd edib ki, şəhidin vətən qarşısında göstərdiyi xidmətlər Azərbaycan Respublikasının Prezidenti İlham Əliyevin müvafiq Sərəncamları ilə yüksək qiymətləndirilib, o, “Azərbaycan Silahlı Qüvvələrinin 90 illiyi”, “Azərbaycan Silahlı Qüvvələrinin 95 illiyi”, “Azərbaycan Ordusunun 100 illiyi”, III dərəcəli “Qüsursuz xidmətə görə”, “Vətən uğrunda” (ölümündən sonra), “Füzulinin azad olunmasına görə” (ölümündən sonra) və “İgidliyə görə” (ölümündən sonra) medalları ilə və “Azərbaycan Bayrağı” ordeni ilə təltif olunub.
Quba Rayon İcra Hakimiyyəti Başçısının müavini Səidə Abbasova, Səfərbərlik və Hərbi Xidmətə Çağırış üzrə Dövlət Xidmətinin Quba rayon şöbəsinin rəisi, polkovnik Yasin Aşurov, Azərbaycan Respublikası Dövlət Şəhərsalma və Arxitektura Komitəsinin nümayəndəsi, Memarlıq və İnşaat Universitetinin müəllimi Fəxri Aydəmir, “Polymart” MMC-nin təsisçisi və rəhbəri Rəşad Cabirli, “Vətən Naminə” Şəhid Ailələrinə Dəstək İctimai Birliyinin sədri, şəhid anası Tünzalə Abduləlimova, Vətən müharibəsi qazisi Rəşad Novruzov, ehtiyatda olan polkovnik-leytenant, Vətən müharibəsi iştirakçısı Ayaz Qasımov, mayor Səid Abbasov, Alpan kənd bələdiyyəsinin sədri Əfil Dadaşov, yazıçı-publisist və sənətşünas Əkrəm Qaflanoğlu, eləcə də şəhidin atası Niyaz Məlikov çıxış edərək qəhrəman şəhid Aqil Məlikov haqqında fikirlərini bölüşüblər. Filialın sosial və humanitar məsələlər üzrə direktor müavini Aysel Şeydayevanın moderatorluğu ilə davam etdirilən tədbir filialın istedadlı tələbələri Sevda Müslümova və Günəş İskəndərovun ifasında bədii kompozisiya ilə davam edib.
Sonda şəhid kapitan Aqil Məlikovun atası Niyaz Məlikov Azərbaycan Dövlət Pedaqoji Universitetinin Quba filialının direktoru professor Yusif Alıyevin adından Təşəkkürnamə ilə təltif edilib.
