https://innews.az/uploads/news/2026-04/_innews_002adb75294287ca7d70eb660_o.jpg
Azərbaycan Dövlət Pedaqoji Universitetində (ADPU) Türkiyənin Ardahan Universitetinin nümayəndə heyəti ilə görüş keçirilib. Görüşdə ADPU-nun rektoru professor Cəfər Cəfərov, Tədris departamentinin direktoru dosent Sənan Əliyev və Beynəlxalq əlaqələr şöbəsinin müdiri Günay Məhərrəmova, Ardahan Universitetinin rektoru professor Öztürk Emiroğlu, Xarici əlaqələr üzrə koordinator Doğan Saltaş, Xüsusi katiblik müdiri Fərhad Uzunqaya, Beynəlxalq tələbələr üzrə koordinator Nurgül Moldaliyeva, eləcə də Mirzə Polad və Volkan Özxan iştirak ediblər.
Görüşdə iki universitet arasında gələcək əməkdaşlıq perspektivləri müzakirə olunub. Əməkdaşlığın əsas məqsədi təhsil və elmi sahədə birgə layihələrin həyata keçirilməsi, tələbə mübadiləsi proqramlarının genişləndirilməsi və tədris metodikalarının müasir tələblərə uyğunlaşdırılmasıdır.
Müzakirələrdə Orhun mübadiləsi proqramının icrasına da toxunulub. Qeyd edilib ki, proqram çərçivəsində universitetlər arasında mədəniyyətlərarası əməkdaşlığın və qarşılıqlı təcrübə mübadiləsinin gücləndirilməsi istiqamətində işlər aparılacaq, tələbələr və müəllimlər arasında mütəmadi olaraq görüşlər təşkil ediləcək, elmi tədqiqatlar və mədəni fəaliyyətlər birgə reallaşdırılacaq. Eyni zamanda, ADPU-nun Türkoloji Mərkəzinin Ardahan Universiteti ilə əməkdaşlıq imkanları barədə də geniş müzakirələr aparılıb və bu sahədə qarşılıqlı təcrübə mübadiləsinin dərinləşdirilməsi qərara alınıb.
Görüşün nəticəsi olaraq, iki universitet arasında əməkdaşlıq haqqında memorandum imzalanıb.
Qeyd edək ki, Ardahan Universitetinin nəzdində 7 fakültə, 2 institut və 4 peşə məktəbi mövcuddur.
