https://innews.az/uploads/news/2026-04/_innews_68aa75b6a3a67ef9cbc870b49_o.jpg
Tələbə Elmi Cəmiyyətinin nəzdində fəaliyyət göstərən Gənc Politoloqlar İctimai Birliyi Azərbaycan Dillər Universitetinin 2021-ci il Elmi Şurasının qərarı ilə yaradılıb. İctimai Birliyin sədri professor Novruz Məmmədovun əmri ilə Beynəlxalq Münasibətlər və Regionşünaslıq fakültəsinin tələbəsi Vüsal Hümbətzadə bu vəzifəyə təyin edilib. Novruz Məmmədov bu barədə fikrində qeyd edib ki, gənclərin politologiya və beynəlxalq münasibətlər sahəsində maariflənməsi cəmiyyət üçün olduqca vacibdir. Onun sözlərinə görə, belə təşəbbüslər tələbələrin analitik düşüncəsinin formalaşmasına və gələcəkdə peşəkar kadr kimi yetişməsinə mühüm töhfə verir. Novruz Məmmədov çıxışında Vüsal Hümbətzadənin təşəbbüskar, məsuliyyətli və analitik düşüncəyə malik gənc olduğunu xüsusi vurğulayıb. O qeyd edib ki, Vüsalın bu sahəyə olan marağı və təşkilatçılıq bacarığı Gənc Politoloqların uğurlu fəaliyyətinə mühüm töhfə verəcək. Novruz müəllimin sözlərinə görə, belə gənclərin yetişməsi ölkənin gələcəyi üçün olduqca önəmlidir.
Gənc Politoloqlar İctimai Birliyinin sədri Vüsal Hümbətzadə ilə müsahibəni təqdim edirik:
– Vüsal bəy, ilk olaraq Gənc Politoloqlar təşkilatının yaranma məqsədi haqqında məlumat verərdiniz.
– Gənc Politoloqların əsas məqsədi universitet daxilində və ümumilikdə siyasətə marağı olan gəncləri bir araya gətirməkdir. Biz çalışırıq ki, tələbələr yalnız nəzəri biliklə kifayətlənməsin, həm də aktual siyasi hadisələri analiz etməyi, müzakirə etməyi və öz fikirlərini əsaslandırmağı bacarsınlar. Bu platforma gənclərin dünyagörüşünü genişləndirmək və onların siyasi düşüncə qabiliyyətini inkişaf etdirmək üçün yaradılıb.
– Təşkilatın fəaliyyət istiqamətləri nələrdir?
– Bizim fəaliyyətimiz əsasən debatlar, diskussiyalar, seminarlar və konfranslar üzərində qurulub. Beynəlxalq münasibətlər, politologiya və təhlükəsizlik kimi sahələrdə aktual mövzuları müzakirəyə çıxarırıq. Eyni zamanda təlimlər vasitəsilə gənclərin analitik düşüncə bacarıqlarını inkişaf etdirməyə çalışırıq.
– Gənc Politoloqlara qoşulan tələbələr hansı imkanlar əldə edir?
– Tələbələr burada kollektivdə işləməyi, hadisələri analiz etməyi, qərarvermə və nəticə çıxarma bacarıqlarını inkişaf etdirirlər. Bundan əlavə, müxtəlif layihələrdə iştirak edərək sertifikatlar və hədiyyələr qazanmaq şansı əldə edirlər. Ən önəmlisi isə peşəkar təlimçilərlə ünsiyyət qurmaq və real biliklər qazanmaq imkanıdır.
– Sizcə, bu gün gənclərin siyasətə marağı hansı səviyyədədir?
– Son illərdə bu marağın artdığını müşahidə edirik. Xüsusilə qlobal hadisələr, regionda baş verən proseslər gənclərin diqqətini siyasətə yönəldir. Amma bu marağın düzgün istiqamətləndirilməsi vacibdir. Biz də məhz bu boşluğu doldurmağa çalışırıq.
– Politoloq olmaq istəyən gənclərə nə tövsiyə edərdiniz?
– İlk növbədə, geniş dünyagörüşünə sahib olmaq lazımdır. Politoloq yalnız siyasəti deyil, eyni zamanda iqtisadiyyatı, hüququ və cəmiyyətin davranışlarını da anlamalıdır. Oxumaq, araşdırmaq və analiz etmək bu sahədə əsas şərtlərdəndir. Ən vacibi isə obyektiv və qərəzsiz olmaqdır.
– Politoloqla siyasətçi arasında fərqi necə izah edərdiniz?
– Politoloq siyasəti öyrənən və analiz edən şəxsdir, siyasətçi isə həmin siyasəti həyata keçirən. Yəni politoloq daha çox nəzəri və analitik sahədə fəaliyyət göstərir, siyasətçi isə praktik sahədə qərarlar qəbul edir və onları tətbiq edir.
– Siz tez-tez siyasəti şahmatla müqayisə edirsiniz. Bu bənzətməni necə izah edərdiniz?
– Şahmatda hər gediş əvvəlcədən düşünülür və gələcək addımlara hesablanır. Siyasətdə də eyni yanaşma mövcuddur. Təsadüfi qərarlar uğur gətirmir. Geosiyasətdə hər addım strateji düşüncənin nəticəsidir. Buna görə də gənclərə tövsiyəm odur ki, hadisələrə səthi yox, dərin və analitik yanaşsınlar.
– Gələcək planlarınız nələrdir?
– Gənc Politoloqlar olaraq fəaliyyətimizi daha da genişləndirmək, beynəlxalq əməkdaşlıqları artırmaq və daha çox gənci bu sahəyə cəlb etmək istəyirik. Məqsədimiz Azərbaycanda politologiya sahəsində güclü, analitik düşüncəyə malik bir gənc nəsil formalaşdırmaqdır.
– Sonda gənclərə mesajınız nə olar?
– Siyasət hər birimizin həyatına təsir edir. Ona görə də bu sahədən uzaq durmaq yox, onu anlamağa çalışmaq lazımdır. Öz üzərinizdə işləyin, sual verin, araşdırın və heç vaxt öyrənməkdən vaz keçməyin.
– Təşəkkürlər. Sağolun
Qeyd edək ki, Gənc Politoloqlar İctimai Birliyinin idarəetmə heyəti və struktur üzrə təyinatlar aşağıdakı kimidir:
Birliyin sədri Vüsal Hümbətzadədir. Ümumi işlər üzrə sədr müavini vəzifəsini Həlilə Yaqubzadə icra edir. Sosial məsələlər üzrə sədr müavini Rəna Şabanzadə, elmi işlər üzrə sədr müavini Sənubər Seyidli, təşkilat işləri üzrə sədr müavini Fidan Cəfərli, xarici məsələlər üzrə sədr müavini Firuzə Zamanlı, koordinatorlar üzrə sədr müavini isə Əfsanə Nuriyevadır. Sədrin müşaviri vəzifəsində Murad Sadıqov fəaliyyət göstərir.
Fakültə və şöbələr üzrə koordinatorlar isə belə müəyyən olunub: Beynəlxalq Münasibətlər və Regionşünaslıq fakültəsi üzrə Yetər Mehrabova, Təhsil 1 fakültəsi üzrə Səma Vahabzadə, Təhsil 2 fakültəsi üzrə Ramilə Əliyeva, Filologiya fakültəsi üzrə Nərgiz Namazova, Tərcümə fakültəsi üzrə Aydın Həsənli və Jurnalistika şöbəsi üzrə Sara İbrahimova.
Bu struktur Gənc Politoloqlar İctimai Birliyinin fəaliyyətinin daha sistemli və koordinasiyalı şəkildə həyata keçirilməsinə xidmət edir.
ADU Gəncə Politoloqlar İctimai Birliyinin Təhsil 1 fakültəsi üzrə koordinatoru Səma Vahabzadə:
Qeyd edək ki Gənc Politoloqlar İctimai Birliyinin sədri tərəfindən 60 yaxın aztəminatlı və şəhid ailələrinə yardım ərzaqları göndərilib.
Hazırladı: Səkinə Sadıxova
12.12.2022 10:00
