ADU-da “İngilis dilində rahat danışaq” adlı təlim keçirilib

ADU-da “İngilis dilində rahat danışaq” adlı təlim keçirilib ADU-da “İngilis dilində rahat danışaq” adlı təlim keçirilib https://innews.az/az/news/id-60440

Azərbaycan Dillər Universitetinin Tələbə Elmi Cəmiyyətinin nəzdində fəaliyyət göstərən Gənc Politoloqlar İctimai Birliyinin təşkilatçılığı ilə 1 dekabr tarixində saat 13:30-da “İngilis dilində rahat danışaq” adlı təlim keçirilib. Təlimin qonağı "İtalk Academy"nin təsisçisi Gülnar Əliyeva olub.

Təlim zamanı tələbələrin ingilis dilini öyrənərkən qarşılaşdıqları problemlər və bu problemlərin aradan qaldırılması yolları müzakirə edilib. Eyni zamanda, ingilis dilində sərbəst danışma bacarığının üstünlükləri və faydaları barədə iştirakçılara ətraflı məlumat verilib.

Tədbirdə çıxış edən Gənc Politoloqlar İctimai Birliyinin sədri Vüsal Hümbətzadə diplomatiyada ingilis dilinin rolu barədə danışaraq tələbələrə əlavə məlumatlar təqdim edib.

Daha sonra ADU-nun Biliyin Qiymətləndirilməsi və Monitorinq Şöbəsinin müdiri Fatma Qurbanzadə tələbələrlə ingilis dilinin vacibliyi haqqında fikirlərini bölüşüb və onların suallarını cavablandırıb.

ADU-nun elm və innovasiya məsələləri üzrə prorektoru professor Novruz Məmmədov isə belə tədbirlərin təşkil olunmasının vacibliyini vurğulayıb və bu tədbirə görə Gənc Politoloqlar İctimai Birliyinin üzvlərinə və İTALK Academy təsisçi-rəhbəri Gülnar Əliyevaya təşəkkürünü bildirib. 

Sonda Gülnar Əliyeva tərəfindən tələbələr üçün xüsusi təşəbbüs elan olunub. Belə ki, 5 tələbəyə ingilis dili üzrə 0-dan C1 səviyyəsinə qədər tam ödənişsiz təhsil imkanı təqdim ediləcəyi bildirilib.

Təlim interaktiv müzakirələrlə davam edib və iştirakçılar tərəfindən böyük maraqla qarşılanıb.

 

Hazırladı: Səkinə Sadıxova 

12.01.2022