https://innews.az/uploads/news/2026-04/_innews_a760abf0e176b2d14326a5e5e_o.jpg
Azərbaycan tibb elminin inkişafında mühüm xidmətləri olan görkəmli alim, akademik Zərifə Əliyeva yalnız ölkəmizdə deyil, beynəlxalq səviyyədə də tanınmış şəxsiyyətlərdən biridir. O, oftalmologiya sahəsində apardığı fundamental tədqiqatlar və əldə etdiyi elmi nailiyyətlərlə tarixə düşmüşdür.
Zərifə Əliyeva xüsusilə göz xəstəliklərinin, o cümlədən peşə ilə əlaqədar yaranan görmə problemlərinin öyrənilməsi sahəsində böyük uğurlar əldə etmişdir. Onun araşdırmaları sənaye sahəsində çalışan insanların göz sağlamlığının qorunmasına yönəlmiş və bu istiqamətdə mühüm nəticələr vermişdir.
Alimin elmi fəaliyyəti nəticəsində bir sıra yeni müalicə üsulları işlənib hazırlanmış, oftalmologiya elminə dəyərli töhfələr verilmişdir. Onun əsərləri bu gün də tibb sahəsində aktual olaraq qalır və mütəxəssislər tərəfindən geniş istifadə olunur.
Zərifə Əliyeva oftalmologiya sahəsində qazandığı böyük nailiyyətlərə görə keçmiş Sovet məkanında ən nüfuzlu mükafatlardan biri sayılan M.İ. Averbax adına mükafata layiq görülmüşdür. Bu mükafat onun elmi fəaliyyətinə verilən yüksək qiymətin bariz nümunəsi idi.
Qeyd etmək lazımdır ki, Zərifə Əliyeva bu mükafata layiq görülən ilk azərbaycanlı qadın olmuşdur. Bu fakt onun yalnız elm sahəsində deyil, həm də Azərbaycan qadınının intellektual potensialının nümayişi baxımından xüsusi əhəmiyyət daşıyır.
Zərifə Əliyeva yalnız alim kimi deyil, həm də yüksək mənəvi keyfiyyətlərə malik insan kimi yadda qalmışdır. Onun həyat yolu gənc nəsil üçün örnəkdir. O, daim insanlara xidmət etməyi, elmə bağlılığı və vətənə sədaqəti ilə seçilmişdir.
Bu gün onun adı Azərbaycan tarixində hörmət və ehtiramla çəkilir, xatirəsi böyük sevgi ilə anılır. Onun elmi və mənəvi irsi gələcək nəsillər üçün dəyərli bir mirasdır.
Zərifə Əliyevanın həyat və fəaliyyəti Azərbaycan qadınının elm və cəmiyyət həyatında necə yüksək zirvələr fəth edə biləcəyinin parlaq nümunəsidir. Onun M.İ. Averbax adına mükafata layiq görülməsi yalnız şəxsi uğur deyil, bütövlükdə Azərbaycan elminin nailiyyəti kimi qiymətləndirilməlidir.
YAP Şirvan şəhər təşkilatının məsləhətçisi
İsrayılov Amil Faiq oğlu
