https://innews.az/uploads/news/2026-04/_innews_2848794fa9306534ac4978480_o.jpg
"Credence Group", Azərbaycan Sahibkar Qadınlar İctimai Birliyinin (ASQİB) təşkilatçılığı ilə 26 aprel 2026-cı il tarixində, saat 15:00-da Gəncə şəhərində yerləşən “İmperial” restoranında Qadın Sahibkarlarının I Qurultayı baş tutacaq.
“Güclü qadınlar, sonsuz imkanlar” şüarı altında keçirilən tədbir, qadın sahibkarlığının inkişafına dəstək vermək, biznes mühitində qadınların rolunu gücləndirmək və regionlarda yeni əməkdaşlıq platformalarının qurulmasına şərait yaratmaq məqsədi daşıyır.
Qurultay çərçivəsində öz sahəsində böyük uğurlar qazanmış nüfuzlu şəxslər spiker və fəxri qonaq qismində iştirak edəcəklər. Tədbirdə Sahibkar Qadınlar İctimai Birliyinin sədri, həmçinin "Qızıl Əllər" MMC tədris müəssisəsinin təsisçisi Zenfira Ağayeva,
fəxri qonaq kimi Azərbaycan Kənd Qadınları Assosiasiyasının Sədri Gülbəniz Qənbərova, spikerlər qismində isə Milli Məclisin İqtisadi siyasət, sənaye və sahibkarlıq komitəsinin üzvü, millət vəkili, akademik Ziyad Səmədzadə, tanınmış rəssam-modelyer, Azərbaycan Dövlət Mədəniyyət və İncəsənət Universitetinin dosenti və "Fakhriya Khalafova" moda evinin təsisçisi Fəxriyyə Xələfova, "DESTEC GROUP" İdarə heyətinin sədri, iqtisadi ekspert və biznes konsultant Sakit Səmədov, həmçinin "EP" MMC və "Gəncə ABAD" İTB-nin təsisçi direktoru Pəri Eyyubova kimi nüfuzlu şəxslər çıxış edərək öz zəngin təcrübələrini iştirakçılarla bölüşəcəklər.
Rəsmi proqram qırmızı xalça keçidi və musiqili qarşılanma ilə başlayacaq, ardınca açılış mərasimində qadın sahibkarlığının ölkə iqtisadiyyatındakı strateji rolu və məşğulluğun artırılmasındakı əhəmiyyəti barədə məruzələr dinləniləcək. Qurultay müddətində fəaliyyət göstərəcək xüsusi sərgi zonasında iştirakçılar öz məhsul və xidmətlərini təqdim etmək, potensial müştərilər və biznes tərəfdaşları ilə birbaşa B2B əlaqələr qurmaq imkanı əldə edəcəklər. Tədbirin yekununda milli ornamentlərin müasir təqdimatla birləşdirildiyi interaktiv mədəni proqram və işgüzar nahar təşkil olunacaq ki, bu da iştirakçılar arasında sərbəst ünsiyyəti və gələcək əməkdaşlıqları stimullaşdıracaqdır.
Əlaqə telefonu: +994 77 122 21 02
