https://innews.az/uploads/news/2022-11/_innews_912551c3f3a7b9fe8fb2fd478_o.jpg
Kanadanın Toronto şəhərində yerləşən Azərbaycan Qadınlarına Dəstək Məskəzinin (Azerbaijani Women’s Support Centre (AWSC)) təşəbbüsü ilə tanınmış filosof alim, Fəlsəfə İnstitutunun İslam fəlsəfi şöbəsinin müdiri, AMEA-nın müxbir üzvü Könül Bünyadzadə ilə onlayn görüş keçirilib.
Əvvəlcə AWSC-nin sədri Minirə Babayeva mərkəzin fəaliyyət istiqamətləri barədə məlumat verib.
Daha sonra vebinarın moderatoru Könül Qurbanova filosof alim Könül Bünyadzadənin elmi fəaliyyətindən danışıb, onun bir sıra nüfuzlu cəmiyyətlərin üzvü, Asiya Fəlsəfə Assosiasiyasının vitse-prezidenti olduğunu bildirib. Qeyd edib ki, Könül Bünyadzadə 2002-ci ildə "Sərrac Tusinin "əl-Lümə" əsərində sufi-fəlsəfi məsələlər" mövzusunda namizədlik dissertasiyasını müdafiə edərək fəlsəfə elmləri namizədi, 2007-ci ildə isə "Şərq və Qərb fəlsəfə tarixində irrasional idrak (orta əsrlər)" adlı doktorluq dissertasiyasını müdafiə edərək fəlsəfə elmləri doktoru elmi dərəcəsi alıb.
“Azərbaycan ədəbi düşüncəsində qadın” mövzusunda çıxış edən Könül Bünyadzadə qadını dinindən və zamanından asılı olmayaraq öz dövrünün, mühitinin siması adlandırıb. Məqsədinin yaşadığı dövrdən və məkandan asılı olmayaraq sabit Azərbaycan qadını obrazını yaratmaq olduğunu deyən məruzəçi öz fikirlərini iki əhəmiyyətli istiqamət üzrə təqdim edib: Azərbaycan ədəbi düşüncəsində qadın müəlliflər və ədəbiyyatda yaranan qadın obrazlar.
Birinci istiqamət üzrə Könül Bünyadzadə VIII əsrdə yaşayıb yaratmış ərdəbilli Fatimə Bərdəidən başlayaraq XX əsrdə Mirvarid Dilbazi, Əzizə Cəfərzadə, Baninə qədər əksər yaradıcı qadınların şəxsiyyəti və əsərləri haqqında məlumat verib. O, həmçinin Güney Azərbaycandan olan Nigar Xiyavi, Rüqəyya Kəbiri, İpək, Susən Nəvadə Razi, Pərisa İslamvənd, Rüqəyyə Səfəri və Solmaz Məhəmmədrzayi kimi müəlliflərin dəə yaradıcılığına toxunub.
Məruzəçi fərqli əsrlərdə görkəmli mütəfəkkir-şairlərin yaratdığı qadın obrazlarına müraciət etməklə onların vurğuladığı yüksək keyfiyyətlərdən danışıb. Alim Dədə Qorqud, Nizami Gəncəvinin “Xəmsə”si, Cəfər Cabbarlının pyesləri, Hüseyn Cavidin şeirlərindəki qəhrəmanlar vasitəsilə Azərbaycan qadınının möhtəşəm portretini canlandırmağa nail olub.
Görüşün sonunda Könül Bünyadzadə ona ünvanlanan çoxsaylı sualları cavablandırıb, qadınlarla bağlı müasir problemlərin həlli barədə müzakirələr aparıb.
Görüş youtube və facebook sosial şəbəkələri ilə canlı yayımlanıb.
Ən son xəbərləri səhifəmizdən də izləyin
