https://innews.az/uploads/news/2026-05/_innews_c9f6fc888e4614facaa240861_o.jpg
Fitnes təkcə idman deyil - bu, sağlam həyat tərzidir. Məqsəd yalnız arıqlamaq və ya əzələ yığmaq yox, eyni zamanda ümumi sağlamlığı yaxşılaşdırmaqdır.
Bu gün mövzumuzla bağlı sualları powerlifting üzrə Azərbaycan çempionatlarının qızıl medalçısı, 10 qat Azərbaycan və 5 qat dünya çempionu Elnarə Məmmədova cavablandırır.
1) Bir çox insan internetdə gördüyü məlumatlarla fitnesə başlayıb tez nəticə gözləyir. Amma sonra məyus olur. Siz bu barədə nə düşünürsünüz?
Bəli, bu gün insanlar internetdən çox istifadə edir. Lakin orada hər zaman düzgün məlumat olmur. Fitnesdə hər bir insana individual yanaşma vacibdir. Zala gələn hər kəsə düzgün, təhlükəsiz və travmasız məşq etmə qaydaları izah olunmalıdır.
2) İnsanlar internetdə gördükləri kimi tez nəticə əldə edə bilərmi, yoxsa bu, genetikadan asılıdır?
Yeni başlayanlara izah etmək lazımdır ki, tələsmək olmaz. Hər bir insanın genetik xüsusiyyətləri fərqlidir və hər kəsin nəticəsi eyni sürətlə olmur. Ən vacibi düzgün proqram və peşəkar məşqçi nəzarətidir. Fitnes travma almaq üçün deyil, sağlam şəkildə inkişaf etmək üçündür.
3) İstənilən nəticəni tez əldə etməmək insanlarda məyusluq yarada bilərmi?
Əlbəttə. Bir çox insan qısa müddətdə ideal bədən quruluşu əldə etmək istəyir. Amma məşqçi düzgün şəkildə izah etməlidir ki, tələskənlik travmaya səbəb ola bilər. Nəticəyə yalnız disiplin, düzgün qidalanma, yuxu rejimi və sağlam həyat tərzi ilə nail olmaq mümkündür.
4) Nəticə gecikəndə bəzi insanlar məşqçilərə qarşı narazılıq göstərir?
Bəli, belə hallar olur. Amma düzgün ünsiyyət və izah nəticəsində bu kimi vəziyyətlərin qarşısını almaq mümkündür. Əsas olan qarşılıqlı anlayışdır.
5) Fitnesdə diet çox vacibdir, amma bəzi insanlar üçün çətindir. Bu barədə fikriniz nədir?
Doğrudur, diet saxlamaq hər kəs üçün asan deyil. Amma düzgün izah və yanaşma ilə bu proses daha rahat olur. Burada məşqçinin rolu çox önəmlidir. Peşəkar və savadlı məşqçi ilə işlədikdə problemlər minimuma enir.
6) Pis yuxu rejimi, qeyri-sağlam qidalanma və zərərli vərdişlər inkişafı ləngidir. Belə insanlara nə tövsiyə edərdiniz?
İdman etmək istəyən hər kəs ilk növbədə həyat tərzinə diqqət etməlidir. Disiplin əsasdır.
Zərərli vərdişlərdən uzaq durmaq, düzgün qidalanmaq, yuxu rejiminə əməl etmək vacibdir.
Eyni zamanda stresdən uzaq durmaq və daha pozitiv düşünmək lazımdır. Unutmayın: sağlam bədəndə sağlam ruh olar.
7) Arıqlamaq istəyənlər zala getmədən evdə nəticə əldə edə bilərlər?
Arıqlamaq mümkündür, amma idmansız arıqladıqda bədən əsasən əzələ kütləsini itirir. Bu isə arzuolunan nəticə deyil. Fitnes zalında isə güc məşqləri və kardio birlikdə tətbiq olunur, bu da daha düzgün və sağlam nəticə verir. Əlbəttə, düzgün qidalanma da vacib şərtdir.
Nəticə:
Fitnes - səbr, disiplin və düzgün yanaşma tələb edən bir prosesdir. Tələsmədən, peşəkar dəstək və sağlam həyat tərzi ilə istədiyiniz nəticəyə çatmaq mümkündür.
