https://innews.az/uploads/news/2022-11/_innews_8f0732d8e720e1cceca909c6e_o.jpg
İstanbulda V Beynəlxalq Qadın və Ədalət Zirvə toplantısı keçirilir. Türkiyənin Ailə və Sosial Xidmətlər Nazirliyi, Qadın və Demokratiya Dərnəyi (KADEM) tərəfindən təşkil olunan tədbirdə Azərbaycanı Ailə, Qadın və Uşaq Problemləri üzrə Dövlət Komitəsinin sədri Bahar Muradova təmsil edir.
Tədbirin açılış mərasimində Türkiyə Prezidenti Rəcəb Tayyib Ərdoğanla yanaşı KADEM sədri Saliha Okur Gümrükçüoğlu, ailə və sosial xidmətlər naziri Derya Yanık çıxış ediblər.
Sonra BMT-nin Qadınlar, Avropa və Mərkəzi Asiya üzrə regional direktoru və Türkiyə nümayəndəsi Alia El-Yassirin moderatorluğu ilə “Daha ədalətli olmağa doğru: qadınlar dəyişikliyin obyekti kimi” mövzusunda liderlər iclası keçirilib.
İclasda Türkiyənin Ailə və Sosial Xidmətlər naziri Dərya Yanıkın, Azərbaycanın Ailə, Qadın və Uşaq Problemləri üzrə Dövlət Komitəsinin sədri Bahar Muradovanın, Əlcəzair, Sinqapur, Tanzaniya, Liviya və Fələstin nazirlərinin çıxışları dinlənilib.
Liderlər iclasında çıxış edən Dövlət Komitəsinin sədri Bahar Muradova növbəti dəfə qardaş ölkədə olmaqdan məmnunluğunu ifadə edib, Azərbaycanın Vətən müharibəsində əldə etdiyi tarixi Qələbə haqqında danışıb.
O, qeyd edib ki, “Mədəni kodlar və Qadın” mövzusunda keçirilən bu mötəbər Zirvə toplantısının gündəliyi ölkələrimizdə və ümumiyyətlə dünyada baş verən transformasiyaların qadınların həyatına təsirləri barədə hərtərəfli diskussiya aparmaq üçün geniş imkanlar yaradır.
B.Muradova Azərbaycan dövlətinin qadın hüquqlarının təmin olunmasına xüsusi əhəmiyyət verdiyini, gender bərabərliyi, qadınların sosial və ictimai həyatın bütün sahələrində bərabər iştirakını təmin etməyə yönəlmiş siyasət apardığını diqqətə çatdırıb. “Vaxtilə Şərqdə qızların təhsilinə qayğı göstərən ilk ölkələrdən biri olan Azərbaycanda səhiyyə və elmi fəaliyyət sahələrində qadınların üstünlüyü, ölkənin sosial-iqtisadi və siyasi həyatında iştirak payı, parlament və bələdiyyələrdə təmsilçiliyi, texniki və yeni yaranan fəaliyyət sahələrində iştirakçılıq faizi də artmaqdadır”, - deyə əlavə edib.
O, Azərbaycan hökuməti tərəfindən xüsusən regionlarda qadın və qızların ictimai-siyasi həyatda fəal iştirakının təşviqi və onların səhiyyəyə əlçatanlığa dair imkanların genişləndirilməsi üçün mühüm tədbirlər görüldüyünü diqqətə çatdırıb.
Sədr Azərbaycanda “Məişət zorakılığının qarşısının alınması haqqında” Qanunun və müvafiq Fəaliyyət Planının bu istiqamətdə effektiv və hərtərəfli fəaliyyətə daha geniş imkanlar yaratdığını bildirib.
Qadına qarşı zorakılıqdan danışarkən silahlı münaqişələrin yaratdığı fəsadlara diqqət çəkən B.Muradova dünyanın pandemiya ilə mübarizə apardığı bir zamanda Ermənistanın Azərbaycana qarşı növbəti hərbi təcavüzü və 44 gün davam edən Vətən müharibəsinin Azərbaycanın bütün gücünü bir yumruq halında cəmləyərək, qardaş Türkiyənin də siyasi və mənəvi dəstəyi ilə öz torpaqlarını işğaldan azad etdiyini və tarixi ədalətin bərpa olunduğunu qeyd edib. “Azərbaycan, qurucu lideri, dahi siyasətçi Heydər Əliyevin siyasi yoluna və dövlətçilik ənənələrinə sadiqliyini davam etdirərək, ölkədə və regionda sülhün, sabitliyin tərəfdarı kimi çıxış edir, multikultural dəyərlərə önəm verdiyini nümayiş etdirir”, - deyə B.Muradova əlavə edib.
Hazırda işğaldan azad olunmuş ərazilərdə məcburi köçkünlərin öz yurd-yuvalarına qayıtmasına istiqamətlənən bərpa və quruculuq işlərinin həyata keçirildiyinə diqqət çəkən komitə sədri bildirib ki, işğal dövründə tamamilə dağıdılmış həmin ərazilərin kütləvi şəkildə minalarla çirkləndirilməsi dövlətin genişmiqyaslı quruculuq planlarının həyata keçirilməsinə ciddi şəkildə maneə törədir.
Qeyd edək ki, Zirvə toplantısı noyabrın 5-də davam edəcək.
AZƏRTAC
