https://innews.az/uploads/news/2026-05/_innews_dfbce9151633a422718d3d0c3_o.jpg
Bakı Dövlət Universitetinin (BDU) Tələbə Həmkarlar İttifaqı Komitəsi (THİK) və Coğrafiya fakültəsinin təşkilatçılığı ilə “Şəhərsalma və Memarlıq İli” çərçivəsində “Coğrafi İnformasiya Sistemləri (CİS)” mövzusunda üçgünlük təlim keçirilib.
Təlimlər Coğrafiya fakültəsinin CİS üzrə mütəxəssisi İsmayıl Rəhimli tərəfindən aparılıb. Təlim çərçivəsində iştirakçılara CİS-in nəzəri və praktiki əsasları, müasir dövrdə tətbiq sahələri və rəqəmsal xəritələşdirmə texnologiyalarının əhəmiyyəti barədə geniş məlumat verilib. Təlimin ilk günündə məkan məlumatlarının toplanması, emalı, idarə olunması və vizuallaşdırılması prinsipləri izah olunub, CİS texnologiyalarının ekologiya, şəhərsalma, kənd təsərrüfatı, nəqliyyat və regional planlaşdırma sahələrində istifadəsi nümunələr əsasında təqdim edilib. Növbəti sessiyada iştirakçılar “ArcGIS” proqramının funksional imkanları ilə tanış olub, proqram interfeysi, koordinat sistemləri, laylarla işləmə prinsipi, atribut məlumatlarının idarə olunması və məkan analiz metodları barədə ətraflı bilik əldə ediblər. Praktiki hissədə müxtəlif coğrafi məlumatların emalı, tematik xəritələrin hazırlanması və məkan analizlərinin aparılması üzrə tapşırıqlar yerinə yetirilib. Təlimin son günündə isə iştirakçılar əldə etdikləri bilik və bacarıqları tətbiq edərək hazırladıqları xəritə layihələrini təqdim ediblər. İşlərin texniki quruluşu, kartoqrafik dizaynı və analitik yanaşmaları müzakirə olunub, rəy və tövsiyələr verilib.
Sessiyanın sonunda təlim iştirakçıları sertifikatlarla təltif olunublar.
