https://innews.az/uploads/news/2026-05/_innews_dd77a29a55e3d399fdadc1b22_o.jpg
Mayın 15-də Yeni Azərbaycan Partiyasının Yasamal Rayon Təşkilatında Azərbaycan Respublikasının Prezidenti Cənab İlham Əliyevin 22 dekabr 2025-ci il tarixli "2026-cı ilin Şəhərsalma və Memarlıq İli" elan edilməsi haqqında Sərəncamına əsasən Azərbaycan Respublikası Fövqəladə Hallar Nazirliyi, Yeni Azərbaycan Partiyasının Yasamal Rayon Təşkilatı, Yasamal Rayon İcra Hakimiyyəti və AMEA nəzdində Respublika Seysmoloji Xidmət Mərkəzinin birgə təşkilatçılığı ilə “Şəhərsalma və Memarlıq İli”nə həsr olunmuş “Şəhərsalmada seysmik təhlükənin və riskin qiymətləndirilməsində yeni yanaşmalar” mövzusunda konfrans keçirilib.
Konfransda Azərbaycan Respublikası Fövqəladə Hallar nazirinin müavini Cəbrayıl Xanlarov, YAP Yasamal Rayon Təşkilatının sədri Bəxtiyar Nəbiyev, Yasamal Rayon icra hakimiyyətinin başçısı Elşad Həsənov, Fövqəladə Halllar Nazirliyi Tikintidə Təhlükəsizliyə Nəzarət Dövlət Agentliyi Təsisatdankənar Dövlət Ekspertiza Baş İdarəsinin rəisi Təyyar Hüseynli və rəis müavini Elxan Əsədov, Azərbaycan Avtomobil Yolları Dövlət Agentliyinin İdarə Heyətinin sədr müavini Əvəz Qocayev, AMEA nəzdində Respublika Seysmoloji Xidmət Mərkəzinin baş direktoru, AMEA-nın müxbir üzvü, professor Qurban Yetirmişli, “Bakı Metropoliteni” QSC-nin sədr müavini Hidayət Məmmədov, Ekologiya və Təbii Sərvətlər nazirinin müavini Vüqar Kərimov, Azərbaycan Dövlət Su Ehtiyatları Agentliyinin sədr müavini İlham Bayramov, millət vəkilləri Aydın Mirzəzadə və Göydəniz Qəhrəmanov, AMEA Memarlıq və İncəsənət İnstitutunun direktoru, AMEA-nın müxbir üzvü, Ərtegin Salamzadə, “AzərGold” QSC-nin Sağlamlıq Əməyin Təhlükəsizliyi Ətraf Mühit şöbəsinin müdiri Eldəniz Bayramlı, Dövlət Şəhərsalma və Arxitektura Komitəsinin və digər əlaqədar dövlət qurumlarının rəsmi şəxsləri, BDU və Azərbaycan Memarlıq və İnşaat Universitetinin professor-müəllim heyəti və media nümayəndələri iştirak ediblər.
Əvvəlcə YAP Yasamal Rayon Təşkilatında müstəqil Azərbaycan dövlətinin memarı və qurucusu, dünya şöhrətli siyasi xadim, xalqımızın Ümummilli Lideri Heydər Əliyevin büstü önünə güllər düzülüb. Ulu Öndərin əziz xatirəsi ehtiramla yad edilib. Həmçinin konfrans iştirakçıları YAP Yasamal Rayon Təşkilatının foyesində nümayiş etdirilən “Şəhərsalma və Memarlıq İli”nə həsr olunmuş sərgi ilə tanış olublar.
Müasir Azərbaycan dövlərinin qurucusu və memarı, Ümummilli Liderimiz Heydər Əliyevin və Azərbaycanın ərazi bütövlüyü və suverenliyi uğurunda canlarından keçən şəhidlərimizin xatirəsi konfrans iştirakçıları tərəfindən bir dəqiqəlik sükutla yad edilib.
Azərbaycan Respublikasının Dövlət Himninin səsləndirilməsindən sonra konfrans öz işinə başlayıb.
Əvvəlcə AMEA nəzdində Respublika Seysmoloji Xidmət Mərkəzi tərəfindən hazırlanmış “Şəhərsalma və Memarlıq İli”nə həsr olunmuş videoçarx nümayiş olunub.
Konfransın açılış mərasimində çıxış edən YAP Yasamal Rayon Təşkilatının sədri Bəxtiyar Nəbiyev iştirakçıları salamlayaraq bildirib ki, Azərbaycan Respublikasının Prezidenti Cənab İlham Əliyevin imzaladığı 22 dekabr 2025-ci il tarixli Sərəncama əsasən 2026-cı il ölkəmizdə “Şəhərsalma və Memarlıq İli" elan edilib. Onun sözlərinə görə, bir neçə gündən sonra ölkəmizdə daha bir beynəlxalq tədbirə - Ümumdünya Şəhərsalma Forumunun 13-cü Sessiyası (WUF13) keçiriləcək. Məzmununa və əhatə dairəsinə görə bu Forum BMT-nin İqlim Dəyişikliyi üzrə Tərəflər Konfransından (COP) sonra ikinci ən böyük və strateji əhəmiyyətli qlobal platforma hesab olunur. Bu mühüm tədbirin Bakıda təşkili yalnız regional deyil, həm də qlobal miqyasda şəhərsalma, dayanıqlılıq və ətraf mühit sahələrində Azərbaycanın artan liderliyini nümayiş etdirir. Ulu Öndər Heydər Əliyevin 1969-1982-ci illərdə Azərbaycana rəhbərlik etdiyi dövrdə respublikamızda aparılan şəhərsalma və memarlıq abidələrinin bərpası və tikintisi haqqında danışan ərazi təşkilatının sədri bu gün də ölkəmizdə quruculuq işlərinin Möhtərəm Cənab Prezidentimiz İlham Əliyev tərəfindən uğurla davam etdirildiyini bildirib. Qeyd olunub ki, Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın rəhbərliyi ilə mədəni və tarixi irsin qorunması və bərpası istiqamətində mühüm layihələr həyata keçirilir. Bu fəaliyyətlər milli-mənəvi dəyərlərimizin gələcək nəsillərə ötürülməsində mühüm rol oynayır.
Konfransda Azərbaycan Respublikası Fövqəladə Hallar nazirinin müavini Cəbrayıl Xanlarov çıxış edərək şəhərsalmada seysmik təhlükə və riskin öyrənilməsinin əhəmiyyətindən danışıb. Azərbaycanın seysmik bölgədə yerləşdiyini vurğulayan nazir müavini ölkəmizdə aparılan şəhərsalma siyasəti, bu sahədə olan qanunvericilik bazasının təkmilləşdirilməsi, eləcə də aparılan tikinti işlərinə olan dövlət nəzarəti haqqında geniş məruzə ilə çıxış edib. Cəbrayıl Xanlarov diqqətə çatdırıb ki, urbanizasiya prosesinin genişlənməsi, çoxmərtəbəli yaşayış binalarının və yeni yaşayış massivlərinin artması şəhərsalmada seysmik risklərin daha dərindən və kompleks şəkildə qiymətləndirilməsini zəruri edir. Müasir şəhərlər yalnız memarlıq-estetik baxımdan deyil, eyni zamanda təhlükəsizlik və dayanıqlılıq meyarları üzrə də yüksək standartlara cavab verməlidir. Onun sözlərinə görə, seysmik təhlükənin qiymətləndirilməsi artıq təkcə elmi məsələ deyil, dövlət təhlükəsizliyi, iqtisadi inkişaf və əhalinin rifahı ilə birbaşa bağlı olan strateji istiqamətə çevrilib. Bu sahədə beynəlxalq standartların tətbiqi, innovativ yanaşmaların genişləndirilməsi və region ölkələri arasında informasiya mübadiləsinin gücləndirilməsi xüsusi əhəmiyyət daşıyır.
Nazir müavini çıxışının sonunda qeyd edib ki, hazırda Bakı şəhəri və Abşeron yarımadası üzrə seysmik mikrorayonlaşdırma işləri həyata keçirilir və bu istiqamətdə aidiyyəti dövlət qurumları ilə birgə koordinasiyalı fəaliyyət davam etdirilir.
AMEA nəzdində RSXM-nin baş direktoru, AMEA-nın müxbir üzvü, professor Qurban Yetirmişli “Şəhərsalmada seysmik təhlükənin və riskin qiymətləndirilməsində yeni yanaşmalar” mövzusunda geniş məruzə ilə çıxış edib. AMEA nəzdində RSXM tərəfindən aparılan kompleks geofiziki-seysmoloji-geodinamik və geokimyəvi tədqiqat üsullarından danışan baş direktor şəhərsalmada seysmik təhlükənin və riskin öyrənilməsi sahəsində olan yeni yanaşmalar haqqında da ətraflı danışıb. Heç bir ölkənin təbii fəlakətlərdən sığortalı olmadığını bildirən professor Qurban Yetirmişli bildirib ki, tikinti aparılan ərazilərdə seysmik təhlükənin və riskin öyrənilməsi həm də həmin ərazidə qabaqlayıcı tədbirlərin görülməsi baxımından zərurətdir. Çıxışında 2023-cü ilin fevralın 6-da qardaş Türkiyənin Kahramanmaraş şəhərində baş verən zəlzələ haqqında danışan RSXM rəhbəri orada aparılan tədqiqatlar zamanı bir sıra tikililərin tamamilə məhv olduğunu, bəzi tikililərin isə qəzalı vəziyyətə düşməsinə baxmayaraq dağılmamasını həmin ərazilərdə seysmik qiymətləndirilmənin ümumi ərazi üzrə qiymətləndirilməsi ilə izah edib. Baş direktor bildirib ki, baş verən hadisələr və elm göstərir ki, hər bir tikilinin yerləşdiyi ərazinin seysmikliyi fərdi şəkildə öyrənilməlidir.
Tədbirdə çıxış edən millət vəkili Aydın Mirzəzadə bildirib ki, Bakı şəhərində və regionlarda həyata keçirilən müasir şəhərsalma siyasəti təhlükəsiz və dayanıqlı inkişaf prinsiplərinə əsaslanır. O, seysmik risklərin nəzərə alınmasının bu prosesin ayrılmaz hissəsi olduğunu vurğulayıb. Qeyd edib ki, Ulu Öndər Heydər Əliyev tərəfindən əsası qoyulan şəhərsalma və dövlətçilik strategiyası bu gün Prezident İlham Əliyev tərəfindən müasir tələblərə uyğun şəkildə uğurla davam etdirilir. Deputat vurğulayıb ki, dövlət başçısının birbaşa diqqət və qayğısı nəticəsində paytaxtda və regionlarda həyata keçirilən quruculuq işləri şəhər mühitinin təhlükəsizliyinin və əhalinin rifahının təmin olunmasına xidmət edir.
Konfrans Yeni Azərbaycan Partiyasının Himninin səsləndirilməsindən sonra xatirə şəkilinin çəkilməsi ilə öz işini başa vurub.
