Leysan Qədimbəylinin xatirəsinə tələbələrin təhsilinə dəstək göstəriləcək

Leysan Qədimbəylinin əziz xatirəsinə həsr olunmuş məclisdə ailəyə dəstək məqsədilə edilən yardımların tələbələrin təhsilinə yönləndirilməsi qərara alınıb.

Qədimbəylilər ailəsinin verdiyi məlumata görə, toplanan yardımlar Sədərək Xeyriyyə Cəmiyyəti vasitəsilə təhsil alan gənclərə dəstək məqsədilə istifadə olunacaq.

Ailə bildirib ki, Leysan öyrənməyə, yaradıcılığa və gələcəyə bağlı ruhu ilə seçilən gənclərdən biri olub və onun yarımçıq qalan arzularının başqa gənclərin yoluna işıq olmasını istəyirlər.

“İnanırıq ki, bir gəncin xatirəsinə edilən ən gözəl yaxşılıqlardan biri başqa gənclərin gələcəyinə dəstək olmaqdır”, — deyə açıqlamada qeyd olunub.

Qədimbəylilər ailəsi həmçinin bu ağır günlərdə yanlarında olan, dərdlərini paylaşan, dua edən və dəstəyini əsirgəməyən hər kəsə təşəkkürünü bildirib.

“Allah bütün dünyasını dəyişənlərə rəhmət eləsin”, — deyə müraciətdə vurğulanıb.