https://innews.az/uploads/news/2026-05/_innews_cf82df3c00b000eb2a64a211c_o.jpg
Azərbaycan xalqının əsrlər boyu formalaşan dövlətçilik ənənələri milli müstəqillik ideyasının əsas dayaqlarından biri olmuşdur. 1918-ci il 28 May tarixində yaradılan Azərbaycan Xalq Cümhuriyyəti Şərqdə ilk parlamentli respublika kimi tarixə düşərək xalqımızın azadlıq və müstəqillik arzularını gerçəkləşdirmişdir. Bu tarixi hadisə Azərbaycanın gələcək dövlətçilik yolunun ideoloji əsasını formalaşdırmış, milli suverenlik düşüncəsini daha da gücləndirmişdir. Müstəqilliyin yenidən bərpa olunduğu 1991-ci ildən sonra Azərbaycan mürəkkəb siyasi və iqtisadi proseslərlə üz-üzə qaldı. Ölkədə yaranmış böhran vəziyyəti dövlətçiliyin gələcəyini ciddi təhlükə altına salmışdı. Məhz belə bir dövrdə Ümummilli Lider Heydər Əliyevin hakimiyyətə qayıdışı Azərbaycanı parçalanmaq təhlükəsindən xilas etdi, dövlət idarəçiliyində sabitlik yaradıldı və müstəqilliyin möhkəmləndirilməsi istiqamətində mühüm addımlar atıldı.
Heydər Əliyevin müəyyən etdiyi siyasi kurs Azərbaycanın beynəlxalq münasibətlər sistemində etibarlı tərəfdaş kimi tanınmasına səbəb oldu. Milli maraqlara əsaslanan xarici siyasət strategiyası ölkənin dünya dövlətləri ilə əlaqələrinin genişlənməsinə, beynəlxalq təşkilatlarda mövqeyinin güclənməsinə imkan yaratdı. Xüsusilə enerji siyasəti Azərbaycanın qlobal iqtisadi və geosiyasi əhəmiyyətini artırdı. “Əsrin müqaviləsi” ölkənin beynəlxalq nüfuzunun yüksəlməsində mühüm rol oynadı.
Bu siyasi xətt Prezident İlham Əliyev tərəfindən uğurla davam etdirilir. Son illərdə Azərbaycanın beynəlxalq arenada nüfuzu daha da artmış, ölkə regionun aparıcı siyasi və iqtisadi güc mərkəzlərindən birinə çevrilmişdir. Azərbaycanın ev sahibliyi etdiyi beynəlxalq forumlar, humanitar tədbirlər və qlobal layihələr ölkənin dünya siyasətində artan rolunu nümayiş etdirir. Prezident İlham Əliyevin həyata keçirdiyi uğurlu diplomatik strategiya nəticəsində Azərbaycan bir çox beynəlxalq platformalarda prinsipial mövqeyi ilə seçilir. Dövlətimizin milli maraqlara əsaslanan siyasəti ölkənin müstəqil qərarvermə imkanlarını daha da gücləndirmişdir. Azərbaycanın Türk dünyası ilə əlaqələrinin inkişafı, regional əməkdaşlıq layihələrində fəal iştirakı və enerji təhlükəsizliyində oynadığı mühüm rol ölkənin qlobal mövqeyini möhkəmləndirən əsas amillərdəndir.
Bu gün Azərbaycan müstəqil siyasət yürüdən, milli maraqlarını qətiyyətlə qoruyan və beynəlxalq münasibətlər sistemində söz sahibi olan dövlət kimi tanınır. Müstəqillik ənənələrinə sadiqlik, güclü liderlik və milli birlik Azərbaycanın gələcək inkişafının əsas təminatlarından biri olaraq qalır.
Gülöyşə Azadqızı
Azərbaycan Dövlət Pedaqoji Universitetinin müəllimi, gənc alim
Ən son xəbərləri səhifəmizdən də izləyin
