https://innews.az/uploads/news/2026-05/_innews_4547c62e1248746c75785ab82_o.jpg
Azərbaycan Respublikası Gənclər Fondunun dəstəyi, Azərbaycanlı Tələbələr və Məzunlar Platformasının (ASAP) təşkilatçılığı ilə Türkiyə və Macarıstanda 28 may - Müstəqillik Gününə həsr olunmuş tədbirlər keçirilib.
Macarıstanın Budapeşt şəhərində 28 May - Müstəqillik Gününə həsr olunmuş “Gəncliyin gözü ilə Tarixdən Müasirliyə” adlı tədbir baş tutub. Azərbaycan Respublikası Gənclər Fondunun dəstəyi, Azərbaycanlı Tələbələr və Məzunlar Platforması, Macarıstandakı Azərbaycan Evi və Azərbaycan–Macarıstan Məzunlar Birliyinin (AHAU) birgə təşkilatçılığı ilə keçirilən tədbirdə çıxış edən ölkəmizin Macarıstandakı səfiri Tahir Tağızadə, Azərbaycan Evinin rəhbəri İbrahim Səfərli, AHAU-nun sədri, həmçinin ASAP-ın İdarə Heyətinin üzvü Günay Bayramova və tarix üzrə elmlər namizədi Qənirə Mirzəxanlı Azərbaycan Xalq Cümhuriyyətinin milli dövlətçilik tariximizin ən şərəfli səhifələrindən biri olduğunu vurğulayaraq 23 aylıq fəaliyyəti dövründə müsəlman dünyasında ilk parlamentli respublika modelini formalaşdırdığını qeyd ediblər. Bildirilib ki, müstəqilliyini bərpa edən Azərbaycan Ümummilli Lider Heydər Əliyevin rəhbərliyi ilə sabitlik və inkişaf yoluna qədəm qoyub, hazırda isə Prezident İlham Əliyevin rəhbərliyi ilə beynəlxalq aləmdə nüfuzlu mövqeyə sahibdir. Daha sonra isə azərbaycanlı tələbələrlə müstəqillik tarixi, dövlətçilik dəyərləri və bu istiqamətdə gənclərin rolu ətrafında müzakirələr aparılıb.
Türkiyənin Yalova şəhərində isə 28 May – Müstəqillik Günü ilə əlaqədar gənclər görüşü keçirilib. Türkiyədə təhsil alan azərbaycanlı gənclər və Yalova Universitetinin akademik heyət nümayəndələrinin iştirakı ilə baş tutan görüş zamanı Azərbaycanın dövlətçilik tarixi, milli dəyərləri və müstəqillik ənənələri barədə danışılıb. Eyni zamanda, Azərbaycan vətəndaşlarının cinsindən, etnik, dini mənsubiyyətindən, sosial vəziyyətindən asılı olmayaraq, mülki və siyasi hüquqlarının təmin edilməsi, habelə Şərqdə ilk dəfə məhz Azərbaycanda qadınlara seçki hüququnun verilməsi kimi qabaqcıl addımlardan söz açılıb. Bildirilib ki, 1918-ci ildə qurulan Azərbaycan Xalq Cümhuriyyəti Şərqdə ilk parlamentli respublika olmaqla milli dövlətçilik tariximizin mühüm mərhələsini təşkil edir.
Ən son xəbərləri səhifəmizdən də izləyin
