https://innews.az/uploads/news/2026-06/_innews_b650fd5d76e1bf72f1eefd69b_o.jpg
“2025-ci ildə “PAŞA Kapital”ın Bakı Fond Birjasında (BFB) həyata keçirdiyi əməliyyatların ümumi həcmi 44,7 milyard manat təşkil edib. Bu göstərici birjanın ümumi ticarət dövriyyəsinin təxminən 42 faizinə bərabərdir”.
“innews media” xəbər verir ki, bu barədə “PAŞA Kapital”ın Baş direktoru İsi Mustafayev şirkətin 2025-ci ilin maliyyə nəticələrinə həsr olunmuş mətbuat konfransında məlumat verib.
Onun sözlərinə görə, ötən il Bakı Fond Birjasına üzv investisiya şirkətlərinin ümumi ticarət dövriyyəsi 105,7 milyard manat olub. Bu məbləğin 81,4 milyard manatı repo əməliyyatlarının, 18,7 milyard manatı dövlət istiqrazlarının, 4,2 milyard manatı Azərbaycan Mərkəzi Bankının qiymətli kağızlarının, 1,4 milyard manatı isə korporativ istiqrazların payına düşüb.
İ.Mustafayev bildirib ki, “PAŞA Kapital”ın ticarət dövriyyəsi son bir ildə əhəmiyyətli artım nümayiş etdirib. Belə ki, şirkətin Bakı Fond Birjasında həyata keçirdiyi əməliyyatların həcmi 67 faiz artaraq 2024-cü ildəki 26,8 milyard manatdan 2025-ci ildə 44,7 milyard manata yüksəlib.
Baş direktor vurğulayıb ki, əldə olunan nəticələr şirkətin kapital bazarındakı mövqeyinin daha da gücləndiyini və investorların maliyyə alətlərinə marağının artdığını göstərir.
Ən son xəbərləri səhifəmizdən də izləyin
