https://innews.az/uploads/news/2026-06/_innews_3d10e80c40746d52bb23fcd26_o.jpg
III Beynəlxalq Yoqa Festivalı - Nine Senses Fest-2026 ərəfəsində, 12–14 iyun tarixlərində Bakının müxtəlif məkanlarında və Sea Breeze istirahət kompleksində keçiriləcək tədbirin proqramı və konsepsiyasına həsr olunmuş mətbuat konfransı baş tutub.
Nine Senses Fest 2026 sadəcə müxtəlif təcrübələri bir araya gətirən festival deyil. Bu, insanın dayanıb öz daxili dünyasına nəzər sala bildiyi bir məkandır. Bədənin, zehnin və ruhun vahid təcrübə axınında birləşdiyi bir platformadır.
Festival Leyla Əliyeva — Heydər Əliyev Fondunun vitse-prezidenti, Azərbaycan Yoqa Federasiyasının prezidenti və Nine Senses Art Center-in təsisçisinin təşəbbüsü və dəstəyi ilə keçirilir.
Mətbuat konfransında Nine Senses mərkəzinin akademik direktoru Natalya Jukova bildirib ki, festivala hazırlıq yekun mərhələyə çatıb və işlər intensiv şəkildə davam etdirilir.
Nine Senses Fest-2026-nın mövzusu “Köklərdən inkişafa” şüarı seçilib. Bu ideya insanın öz mənşəyinə, mədəni irsinə və ənənələrinə diqqətlə yanaşmasını ifadə edir. Məhz bu dəyərlər gələcək inkişaf, şəxsi yüksəliş və irəliyə doğru hərəkət üçün möhkəm təməl rolunu oynayır.
Festival tədbirləri altı müxtəlif məkanda keçiriləcək. Proqramın bir hissəsi Nine Senses mərkəzinin ərazisində, əsas tədbirlər isə Nine Senses Art Center məkanında təşkil olunacaq. Qonaqlar üçün tematik zonalar, ustad dərsləri, mühazirələr, praktik məşğələlər və dəvətli ekspertlərlə görüşlər hazırlanıb.
Təşkilatçılar uşaq istiqamətinə də xüsusi diqqət ayırıblar. Proqrama gənc iştirakçılar üçün xüsusi təhsil və yaradıcılıq fəaliyyətləri daxil edilib.
Qeyd edək ki, Nine Senses Fest 12, 13 və 14 iyun tarixlərində altı müxtəlif məkanda keçiriləcək. Festivalda Azərbaycan, Rusiya, Hindistan, Türkiyə və Avropadan 80-dən çox aparıcı mütəxəssis iştirak edəcək.
Ən son xəbərləri səhifəmizdən də izləyin
