https://innews.az/uploads/news/2026-06/_innews_b570d4ed8e7eff3898e9e76dd_o.jpg
Azərbaycanda dövlət dəstəyi ilə təqdim olunan aqrar sığorta mexanizmi vasitəsilə əkin sahələri ilə yanaşı, kənd təsərrüfatı heyvanlarını da çoxsaylı risklərdən sığortalamaq mümkündür.
Fermer və təsərrüfatlar aqrar sığorta vasitəsilə heyvanları yoluxucu xəstəliklər, yemdən və otdan zəhərlənmə, yanğın, təbiət hadisələri və fəlakətlər, ilan və həşərat sancması, vəşhi heyvanların hücumu, 3-cü şəxslərin hərəkətləri, kimyəvi maddələrdən zəhərlənmə, avtomobillə vurulma, avtomobillə daşıma zamanı qəza, oğurluq-quldurluq və sair hallar nəticəsində heyvanların tələf olması və məcburi kəsim halından da sığorta edə bilərlər.
Bir neçə gün əvvəl Aqrar Sığorta Fondu tərəfindən Göygöl və Samux rayonlarından olan fermerlərə heyvandarlıq sığortası üzrə ödənişlər həyata keçirilib. Samux rayonunun Füzuli kəndindən olan fermer Mikayıl Camalova məxsus 2 baş iribuynuzlu heyvan yoluxucu xəstəlikdən tələf olduğuna gərə Aqrar Sığorta Fondu tərəfindən 11 700 manat zərər ödənişi edilib.
Bundan başqa, Göygöl rayonunun Yeni Qızılca kəndindən olan tanınmış fermer Mustafa Bəhruza məxsus 2 baş iribuynuzlu heyvan yoluxucu xəstəlikdən tələf olduğuna görə, Fond tərəfindən ona 7 950 manat aqrar sığorta ödənişi həyata keçirilib.
Fermerlərə sığorta ödənişləri Kənd təsərrüfatı nazirinin müavini Zaur Əliyev və Aqrar Sığorta Fondunun idarə heyətinin üzvü Roman Əmircanov tərəfindən təqdim edilib.
Xatırladaq ki, Aqrar Sığorta Fondu ümumilikdə indiyədək heyvandarlıq sığortası üzrə fermer və təsərrüfatlara 3,5 milyon manat sığorta ödənişi həyata keçirib. Ən çox baş verən sığorta hadisələri, yoluxucu xəstəliklər, yemdən otdan zəhərlənmə, vəhşe heyvan hücumu hallarıdır.
Dövlət dəstəkli olmasına, yəni sığorta haqqının yarısının dövlət tərəfindən ödənilməsinə görə, heyvanların aqrar sığorta vasitəsilə sığortalanması fermerlər üçün olduqca əlçatandır.
Belə ki, 1000 manatlıq iribuynuzlu heyvanın (inək və ya camış) illik sığortalanması fermerə cəmi 24-39 manata, 300 manatlıq xırdabuynuzlu heyvanın (qoyun və ya keçi) sığortalanması isə fermerlərə cəmi 7-11 manata başa gəlir.
Fermerlər sığorta haqlarının məbləği və şərtləri ilə Aqrar Sığorta Fondunun rəsmi internet səhifəsindən (asf.gov.az) tanış ola bilərlər.
Ən son xəbərləri səhifəmizdən də izləyin
