https://innews.az/uploads/news/2026-06/_innews_6c58de20742055e2dcc296999_o.jpg
Özbəkistandakı Heydər Əliyev adına Azərbaycan Mədəniyyət Mərkəzində Azərbaycan və Özbəkistan arasında ədəbi-mədəni əlaqələrin inkişafına həsr olunmuş nəşrlərin təqdimat mərasimi keçiriləcək.
Tədbir çərçivəsində tanınmış publisist, “Xalq qəzeti”nin Türküstan üzrə müxbiri Qulu Kəngərlinin tərtib etdiyi və Bakıda çap olunan “Qəlbimiz bir döyünür” almanaxı, “Ədəbi və əbədi körpü” antologiyası, həmçinin müəllifin Daşkənddəki “Renessans press” nəşriyyatında Azərbaycan və özbək dillərində işıq üzü görən “Keçmiş unudulmayanda tarixə dönür” kitabı və “İki xalqın oğlu: Firudin Səfərov” nəşri ictimaiyyətə təqdim ediləcək.
“Qəlbimiz bir döyünür” almanaxı müasir özbək ədəbiyyatının tanınmış nümayəndələrindən olan 36 istedadlı yazarın Azərbaycan dilinə tərcümə edilmiş şeirlərindən ibarətdir. Şeirləri İsmayıllıda yaşayan şair və tərcüməçi Şahməmməd Dağlaroğlu çevirib. Almanaxda yer alan poetik nümunələr müasir özbək poeziyasının ideya-estetik zənginliyini, bədii düşüncə xüsusiyyətlərini və milli-mənəvi dəyərlərini Azərbaycan oxucusuna təqdim edir.
“Ədəbi və əbədi körpü” antologiyası Azərbaycan və Özbəkistan ədəbiyyatları arasında mövcud olan mənəvi bağlılığı, qarşılıqlı ədəbi əlaqələri və ortaq yaradıcılıq ənənələrini əks etdirən mühüm nəşrdir. Kitabda hər iki ölkənin çağdaş ədəbiyyatını təmsil edən 22 tanınmış yazarın — 11 Azərbaycan və 11 özbək şairinin şeirləri yer alıb. Toplunun tərcüməçisi Şahməmməd Dağlaroğludur. Antologiya iki qardaş xalqın ədəbi düşüncəsini bir araya gətirən və Türk dünyasında formalaşan mənəvi-ədəbi körpünün bariz nümunəsi kimi dəyərləndirilir.
Təqdim olunacaq nəşrlər sırasında yer alan “Keçmiş unudulmayanda tarixə dönür” kitabı taleyi Mərkəzi Asiya ilə bağlı olan azərbaycanlıların həyat yoluna, ictimai-mədəni fəaliyyətinə və tarixi izlərinə həsr edilib. Nəşrdə Türküstanda yaşamış və yaşayan tanınmış soydaşlarımız haqqında məlumat verilir, bu torpaqlara sürgün olunmuş azərbaycanlıların ağır taleyi, üzləşdikləri sınaqlar, eləcə də regionda teatr sənətinin formalaşması və inkişafında Azərbaycan sənətkarlarının mühüm rolu işıqlandırılır.
“İki xalqın oğlu: Firudin Səfərov” nəşri Azərbaycanın və Özbəkistanın Xalq artisti, görkəmli opera rejissoru Firudin Səfərovun zəngin həyat və yaradıcılıq yolundan bəhs edir. Kitabda sənətkarın Azərbaycan və Özbəkistan teatr və musiqi mədəniyyətinə verdiyi dəyərli töhfələr, həmçinin iki qardaş xalq arasında mədəni bağların möhkəmlənməsindəki xidmətləri geniş şəkildə təqdim olunur.
Təqdim ediləcək nəşrlər Azərbaycan və Özbəkistan arasında mədəni-humanitar əməkdaşlığın, ədəbi əlaqələrin və qarşılıqlı yaradıcılıq mübadiləsinin daha da inkişaf etdirilməsi baxımından mühüm əhəmiyyət daşıyır. Bu kitablar iki qardaş xalqın ortaq tarixi-mədəni dəyərlərini, mənəvi yaxınlığını və ədəbi-estetik düşüncəsini əks etdirməklə yanaşı, gələcək nəsillərə zəngin elmi, publisistik və bədii irs təqdim edir.
Ən son xəbərləri səhifəmizdən də izləyin
