ADPU-nun 9 şəhid məzunu “Vətənə xidmətə görə” ordeni ilə təltif edilib

Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin 25 iyun 2026-cı il tarixli “Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında şəhid olmuş Azərbaycan Respublikası Müdafiə Nazirliyinin hərbi qulluqçularının və mülki işçilərinin təltif edilməsi haqqında” Sərəncamına əsasən vətən uğrunda qəhrəmancasına şəhid olmuş bir qrup hərbi qulluqçu ölümündən sonra dövlət təltifləri ilə təltif edilib.

Sərəncama əsasən, Azərbaycan Dövlət Pedaqoji Universitetinin (ADPU) Vətən müharibəsində şəhid olmuş 9 məzunu ölümündən sonra 3-cü dərəcəli “Vətənə xidmətə görə” ordeni ilə təltif olunub. Təltif olunanlar arasında kiçik çavuş Tapdıq Çingiz oğlu Ağayev, əsgər Tural Rəfail oğlu Dəmirçiyev, əsgər Vüqar Rza oğlu Əsgərov, baş leytenant Elgün Elman oğlu Əzizov, baş leytenant Etiram Həsən oğlu Hüseynli, əsgər Rəvan Ömür oğlu Lətifov, gizir Cilingir Azad oğlu Nəbiyev, əsgər Ceyhun Aqil oğlu Nüsrətli və əsgər Qoşqar Səxavət oğlu Ömərov yer alırlar.

Qeyd edək ki, Azərbaycan Dövlət Pedaqoji Universitetinin Vətən müharibəsi və sonrakı əməliyyatlarda ümumilikdə 18 məzun və tələbəsi şəhidlik zirvəsinə ucalıb.