https://innews.az/uploads/news/2026-07/_innews_c2a507b368c5295396d983be2_o.jpg
Həvəskarlar arasında təşkil olunan və Əsasnaməsi Azərbaycan Voleybol Federasiyası tərəfindən təsdiqlənən Tüklə Voleybol Liqası uğurla başa çatıb. Artıq 4 ildir Azərbaycan İdman Jurnalistləri Assosiasiyasının (AİJA) dəstəyi ilə keçirilən yarış bu il Ümummilli Lider Heydər Əliyevin 103-cü ildönümünə həsr olunmuşdu.
Azərbaycan Respublikasının Dövlət Himni səsləndirildikdən sonra, Ulu Öndərin və şəhidlərimizin əziz xatirəsi bir dəqiqəlik sükutla yad edildi. Turnirin final mərhələsinin açılış mərasimində təşkilatçılar və fəxri qonaqlar bu liqanın əsas məqsədinin həvəskar voleybolun inkişafına töhfə vermək, sağlam həyat tərzini təşviq etmək və voleybolsevərləri bir araya gətirmək olduğunu vurğuladılar. Bildirildi ki, bu ilin may ayından 9 komanda ilə start götürən 4-cü Tüklə Voleybol Liqası bu mövsüm də maraqlı və gərgin mübarizə ilə yadda qalıb.
Daha sonra, final mərhələsinin nəticələrinə əsasən qaliblər aşağıdakı kimi müəyyənləşib:
- I yer – Kidol VK
- II yer – Qartal VK
- III yer – Zəfər VK
Bağlanış mərasimində qalib və mükafatçılar kubok, medal və diplomlarla təltif olunublar. Eyni zamanda liqanın uğurla təşkilində əməyi olan təşkilatçılara, hakimlərə, komandalara və yarış boyunca komandaları dəstəkləyən azarkeşlərə təşəkkür ifadə olunub.
Dördüncü mövsümünü uğurla başa vuran Tüklə Voleybol Liqası qısa müddətdə həvəskar voleybolun ənənəvi turnirlərindən birinə çevrilərək idmansevərlərin böyük marağını qazanıb. Voleybolun kütləviliyini artırmaq, yeni idmançıların üzə çıxarılmasına dəstək vermək və sağlam rəqabət mühitini təşviq etmək Tüklə Voleybol Liqasının prioritetidir.
Qeyd edək ki, Tüklə Masallı rayonunda yerləşən bir kənddir və zəngin voleybol ənənəsi var. Bu gün artıq Tüklə Voleybol Liqası bir kənd səviyyəsində deyil, Respublika üzrə maraqlı Liqaya çevrilib.
Ən son xəbərləri səhifəmizdən də izləyin
