https://innews.az/uploads/news/2026-07/_innews_8d093ee9c20d83ec05fa78151_o.jpg
Azərkosmosun nəzdində fəaliyyət göstərən KOSMİK Akademiya Beynəlxalq Kosmik Təhsil Məşvərət Şurasının (ISEB) üzv kosmik agentliklərin yekdil səsverməsi ilə ISEB İdarə Heyətinə tam hüquqlu üzv statusunu qazanıb.
Beynəlxalq Kosmik Təhsil Məşvərət Şurası (ISEB) 17 oktyabr 2005-ci ildə yaradılıb və dünyanın qabaqcıl kosmik agentliklərini bir araya gətirir. Bunlar arasında ABŞ-nin Milli Aeronavtika və Kosmos İdarəsi (NASA), Avropa Kosmik Agentliyi (ESA), Kanada Kosmik Agentliyi (CSA), Koreya Aerokosmik Tədqiqat İnstitutu (KARI), Yaponiya Aerokosmik Tədqiqatlar Agentliyi (JAXA) və digər beynəlxalq təhsil və kosmik təşkilatlar yer alır. ISEB-in əsas məqsədi, kosmos elmi və texnologiyaları üzrə təhsilin inkişafını təmin etmək və üzv ölkələr arasında təcrübə mübadiləsini təşviq etməkdir.
KOSMİK Akademiyanın ISEB-ə üzv olması, Akademiyanı dünyaca tanınmış 11 kosmik Akademiya klubunun 12-ci üzvünə çevirir. Bu üzvlük, Azərbaycanın kosmik təhsil və inkişaf sahəsindəki uğurlarının beynəlxalq miqyasda tanınmasına və ölkəmizin bu sahədə daha da geniş imkanlara sahib olmasına töhfə verəcək. Akademiya bu beynəlxalq təşkilatlar vasitəsilə, kosmik sahə ilə bağlı qlobal əməkdaşlıqları artıracaq və müvafiq sahədə kadr potensialının inkişafını irəliyə aparacaq.
Qeyd edək ki, KOSMİK Akademiya artıq 3 ildir ki milli kosmik ekosistemin inkişafında mühüm rol oynayır. Bu üç il ərzində 12 mindən çox məktəbli, gənc və müəllim Akademiyanın yerli və beynəlxalq tərəfdaşlarla əməkdaşlıq çərçivəsində həyata keçirdiyi 26 layihədə iştirak etmişdir.
Beynəlxalq Kosmik Olimpiada, Məhəmməd Bin Rəşid Kosmik Tədqiqatlar Mərkəzində (MBRSC), “StarTech” - GUHEM mərkəzində kosmos, aviasiya, hərbi sənaye üzrə təcrübə mübadiləsi, “APRSAF-30 Stargazing” - Kosmik Fəzanın Müşahidəsi, Beynəlxalq Kosmik Poster Müsabiqəsi, “APRSAF-JAXA” Kosmos, Aviasiya və STEAM seminarları, CanSat Müsabiqəsi, “Space Series” ekosistem proqramları, Qlobal Gənclər Sammiti, Astronavtlarla görüşlər sözügedən layihələrdir. Bu layihələrdən xüsusi önəm daşıyanı - Azərbaycan tarixində ilk dəfə olaraq Azərbaycan məktəblilərinin hazırladığı “Azərbaycanın Zəfəri” peykinin “SpaceX” şirkətinin “Falkon 9” raketi vasitəsilə orbitə buraxılması oldu. 41 orta ümumtəhsil məktəbindən 672 məktəblinin cəlb olunduğu bu layihədə iştirak edən 7-9-cu sinif şagirdlərinin uğuru artıq kosmosdadır.
Ən son xəbərləri səhifəmizdən də izləyin
