https://innews.az/uploads/news/2026-07/_innews_ee3966ec54343e19ab8cc3522_o.jpg
Azərbaycan Dövlət Pedaqoji Universiteti Tələbə Gənclər Təşkilatının (ADPU TGT) təşkilatçılığı və Bakı Şəhər Gənclər və İdman İdarəsinin dəstəyi ilə 13–17 iyul tarixlərində Quba rayonunda keçirilən “Gələcəyin Qurucuları 3” düşərgəsinə start verilib.
Düşərgənin ilk günündə iştirakçılar Ümummilli Lider Heydər Əliyevin Quba şəhərində ucaldılmış abidəsini ziyarət edərək əziz xatirəsini ehtiramla yad ediblər. Sonra Quba Rayon Şəhidlər Xiyabanı və Quba Şəhidlər Muzeyi ziyarət olunub.
Ardınca düşərgənin rəsmi açılış mərasimi keçirilib. Açılış mərasimində çıxış edən ADPU TGT-nin sədri Elmira Babayeva yeddi ildən sonra yenidən təşkil olunan “Gələcəyin Qurucuları” düşərgəsinin tələbələr tərəfindən böyük maraqla qarşılandığını qeyd edib. Qeyd edilib ki, layihə gənclərin liderlik bacarıqlarının inkişafı, potensiallarının üzə çıxarılması və ictimai fəallığının artırılması baxımından mühüm əhəmiyyət kəsb edir.
Quba-Xaçmaz Regional Gənclər və İdman İdarəsinin rəisi Qumru Məmmədova, Bakı Şəhər Gənclər və İdman İdarəsinin baş məsləhətçisi Xasay Vəliyev və ADPU-nun Tədbirlərin təşkili və tələbələrlə iş şöbəsinin baş mütəxəssisi İsmayıl Nəsirov çıxış edərək iştirakçılara uğurlar arzulayıblar. Çıxışlarda belə layihələrin gənclərin bilik və bacarıqlarının artırılması, liderlik keyfiyyətlərinin formalaşdırılması, vətənpərvərlik ruhunun gücləndirilməsi və sosial fəallığının təşviqi baxımından əhəmiyyəti vurğulanıb.
Düşərgənin ilk günü maarifləndirici və interaktiv sessiyalarla davam edib. Təlimçi Rövşən Şərif tərəfindən keçirilən “İngilis dilini öyrənmənin effektiv metodları” mövzusunda təlimdə iştirakçılar müasir dil öyrənmə metodları ilə tanış olublar. Ardınca Vüqar Məmmədovun rəhbərliyi ilə təşkil olunan praktik məşğələ zamanı əldə olunan nəzəri biliklər praktik tapşırıqlar vasitəsilə möhkəmləndirilib. Gün komanda təqdimatları ilə başa çatıb. İştirakçılar komandalarını yaradıcı təqdimatlar, şüarlar və dəyərlərlə təqdim edərək yüksək komanda ruhu nümayiş etdiriblər.
Düşərgənin ikinci günündə ADPU rəhbərliyinin iştirakçılarla görüşü keçirilib. Görüşdə ADPU-nun sosial və humanitar məsələlər üzrə prorektoru professor Fikrət Rzayev, tədris işləri üzrə prorektoru dosent Eldar Aslanov, ADPU-nun Quba filialının direktoru professor Yusif Alıyev və Quba-Xaçmaz Regional Gənclər və İdman İdarəsinin rəisi Qumru Məmmədova, ADPU-nun Tədbirlərin təşkili və tələbələrlə iş şöbəsinin müdiri Turan Kərimli və İctimaiyyətlə əlaqələr və marketinq şöbəsinin müdiri Taleh Mirzəyev iştirak ediblər.
Çıxış edən qonaqlar düşərgənin gənclərin liderlik bacarıqlarının inkişaf etdirilməsi, şəxsi və peşəkar potensialının artırılması, komanda işinin təşviqi və vətənpərvərlik dəyərlərinin möhkəmləndirilməsi baxımından mühüm platforma olduğunu qeyd ediblər. Onlar iştirakçılara gələcək fəaliyyətlərində uğurlar arzulayaraq düşərgə müddətində qazandıqları bilik və təcrübələrdən səmərəli istifadə etməyə çağırıblar. Görüş zamanı tələbələri maraqlandıran suallar cavablandırılıb, onların fikir və təklifləri dinlənilib, qarşılıqlı fikir mübadiləsi aparılıb.
Qeyd edək ki, “Gələcəyin Qurucuları 3” düşərgəsinin əsas məqsədi gənclərin liderlik bacarıqlarının inkişaf etdirilməsi, şəxsi və peşəkar potensialının artırılması, komanda işi, ünsiyyət, vətənpərvərlik və sosial məsuliyyət dəyərlərinin təşviqidir.
Ən son xəbərləri səhifəmizdən də izləyin
