Martinellinin gələcəyi sual altındadır

“Arsenal”ın vingeri Qabriel Martinelli klubundan ayrıla bilər.

London təmsilçisi 25 yaşlı futbolçunu satmaq niyyətindədir.

“Arsenal”ın Martinelli üçün “Qalatasaray”dan 45 milyon avroluq təklif aldığı bildirilir. Ancaq transferin qarşısındakı əsas maneə futbolçunun Türkiyəyə getmək istəməməsidir. Martinellinin ambisiyalarına uyğun olmayan komandaya keçməyi düşünmədiyi və ümumiyyətlə, “Arsenal”dan ayrılmaqda maraqlı olmadığı qeyd olunur. Bu səbəbdən transferin necə nəticələnəcəyi hələlik məlum deyil.

Braziliyalı futbolçu 2019-cu ildən “Arsenal”ın formasını geyinir. O, ötən mövsüm bütün turnirlərdə 53 matçda meydana çıxıb, 11 qol vurub və 7 məhsuldar ötürmə verib.

"Topçular"ın baş məşqçisi Mikel Arteta İngiltərə superkubokunda “Mançester Siti”yə qarşı keçirilən oyunun iştirak ərizəsinə Martinellini daxil etməyib. Oyun "Arsenal"ın 3:0 hesablı qələbəsi ilə başa çatıb.