Bakıda “ALUFAR IRONMAN 70.3 Baku” beynəlxalq triatlon yarışına start verildi

Bakıda “ALUFAR IRONMAN 70.3 Baku” beynəlxalq triatlon yarışı start götürüb.

Tədbirdə Azərbaycan Respublikası Prezidentinin köməkçisi və Heydər Əliyev Fondunun icraçı direktoru Anar Ələkbərov, Azərbaycan Respublikasının gənclər və idman naziri Fərid Qayıbov, Azərbaycan Triatlon Federasiyasının prezidenti Fərid Fərhadzadə və digər rəsmi qonaqlar iştirak ediblər.

Açılış mərasimində Azərbaycan Respublikasının Dövlət Himni səsləndirilib.

“ALUFAR IRONMAN 70.3 Baku” çərçivəsində keçirilən yarışlarda 62 ölkədən 1500-dən çox idmançı iştirak edir. Azərbaycan yarışda 123 idmançı ilə təmsil olunur.

“IRONMAN 70.3” yarışı kişilər və qadınlar arasında 13 yaş kateqoriyası üzrə keçirilir. İştirakçılar ümumilikdə 113,1 kilometrlik məsafəni qət edəcəklər. Yarış 1,9 kilometr üzgüçülük, 90,1 kilometr velosiped və 21,1 kilometr qaçış mərhələlərindən ibarətdir.

Yarış Azərbaycan Respublikasının Gənclər və İdman Nazirliyi, Azərbaycan Triatlon Federasiyası və Bakı Şəhər Halqası Əməliyyat Şirkətinin təşkilatçılığı ilə keçirilir.