Fərid Qayıbov: “IRONMAN”ın Bakıda keçirilməsi bizim üçün növbəti idman bayramıdır

“IRONMAN 70.3” triatlon yarışının ilk dəfə Bakıda keçirilməsi Azərbaycan üçün mühüm idman hadisəsidir.

Gənclər və idman naziri Fərid Qayıbov jurnalistlərə açıqlamasında bildirib ki, yarışın Bakıda keçirilməsi uzun müddətdir gözlənilən tədbirlərdən biri olub.

Nazirin sözlərinə görə, 60-dan çox ölkədən nümayəndələrin və 1000-dən artıq idmançının iştirak etdiyi yarışda Azərbaycanı 100-dən çox atlet təmsil edir.

Fərid Qayıbov qeyd edib ki, son illərdə triatlon Azərbaycanda daha da populyarlaşıb və “IRONMAN” yarışlarında ölkəmizi təmsil edən idmançıların sayı hər il artır.

“Bu yarış idmançılarımız üçün ‘IRONMAN’ statusu qazanmaq baxımından növbəti şansdır. Belə tədbirlərin ölkəmizdə daha çox keçirilməsini istərdim”, – nazir deyib.

O vurğulayıb ki, beynəlxalq idman tədbirlərinin təşkili nazirliyin əsas hədəflərindən biri olan idmanın hər bir vətəndaş üçün həyat tərzinə çevrilməsinə də töhfə verir.

Qeyd edək ki, “IRONMAN 70.3” triatlon yarışı Gənclər və İdman Nazirliyi, Azərbaycan Triatlon Federasiyası və Bakı Şəhər Halqası Əməliyyat Şirkətinin təşkilatçılığı ilə keçirilir.