https://innews.az/uploads/news/2026-09/_innews_537bcbeaf349fd4f56056d0a8_o.jpg
Azərbaycan Dövlət Pedaqoji Universiteti (ADPU) ölkədə pedaqoji kadr hazırlığında aparıcı mövqe tutur.
Belə ki, 2026/2027-ci tədris ili üzrə ali təhsil müəssisələrinin qəbul planına əsasən pedaqoji ixtisaslar üzrə ölkədə 20 ali təhsil müəssisəsində ümumilikdə 8 580 plan yeri nəzərdə tutulub. Bu plan yerlərinin 3 075-i Azərbaycan Dövlət Pedaqoji Universiteti və onun beş filialının payına düşür. Beləliklə, ADPU şəbəkəsi ölkə üzrə pedaqoji ixtisasların ümumi qəbul planının təxminən 36 faizini əhatə edir.
Başqa sözlə, pedaqoji istiqamətlər üzrə hər 100 tələbədən 36-sı ADPU və onun filiallarının payına düşür. Bu göstərici universitetin Azərbaycanda müəllim və pedaqoji kadr hazırlığındakı aparıcı mövqeyini əks etdirir.
ADPU və universitetin Şəki, Quba, Şamaxı, Ağcabədi və Cəlilabad filialları üzrə 2026/2027-ci tədris ili üçün bütün ixtisaslar üzrə ümumi qəbul planı 3 605 yerdir. Bunun 3 075-ni pedaqoji, 530-nu isə qeyri-pedaqoji ixtisaslar təşkil edir. Qeyri-pedaqoji ixtisaslar üzrə nəzərdə tutulan 530 plan yerinin 230-u ADPU-da, 300-ü isə universitetin filiallarındadır. Beləliklə, qeyri-pedaqoji ixtisaslar ADPU şəbəkəsinin ümumi qəbul planının 14,7 faizini təşkil edir. Pedaqoji ixtisasların şəbəkənin ümumi qəbul planındakı payı isə 85,3 faizdir.
Qeyri-pedaqoji istiqamətlər üzrə qəbul imkanlarının genişləndirilməsi ADPU-nun 2030-cu ilədək qəbul planının 30 faizinin sahəyə yaxın qeyri-pedaqoji ixtisaslara şaxələndirilməsi strategiyasının tərkib hissəsidir. Bu yanaşma universitetin əsas missiyası olan müəllim və pedaqoji kadr hazırlığını qorumaqla yanaşı, ixtisas portfelinin əmək bazarının dəyişən tələblərinə uyğun genişləndirilməsini nəzərdə tutur.
Xüsusilə filiallarda qeyri-pedaqoji ixtisaslara 300 plan yerinin ayrılması regionlarda kadr hazırlığının daha geniş istiqamətlər üzrə təşkili, yerli əmək bazarının ehtiyaclarının nəzərə alınması və filialların fəaliyyət profilinin mərhələli şəkildə şaxələndirilməsi baxımından əhəmiyyətlidir.
Ən son xəbərləri səhifəmizdən də izləyin
