https://innews.az/uploads/news/2026-09/_innews_3964a5f924f5945f7b7cb7202_o.jpg
“Bakı İqlim Fəaliyyəti Həftəsi 2026” çərçivəsində Rəqəmsal İnkişaf və Nəqliyyat Nazirliyinin təşkilatçılığı ilə “COP29-dan İqlim Həftəsinə: Yaşıl dünya üçün rəqəmsal fəaliyyət yolu” mövzusunda panel müzakirəsi keçirilib. Davos formatında keçirilmiş tədbirdə dövlət qurumlarını, beynəlxalq təşkilatları və özəl sektoru təmsil edən 100-ə yaxın nümayəndə, habelə ekspertlər iştirak edib.
Panel müzakirəsinin əsas məqsədi iqlim sahəsində qəbul edilmiş öhdəliklərin konkret və ölçülə bilən nəticələrə çevrilməsində rəqəmsal texnologiyaların, innovasiyaların, investisiyaların və tərəfdaşlıqların rolunun müzakirə edilməsi olub.
Müzakirələr zamanı iqlim öhdəliklərinin yalnız hesabatlılıq çərçivəsində deyil, eyni zamanda iqtisadi rəqabətqabiliyyətliliyin, enerji təhlükəsizliyinin və dayanıqlılığın artırılmasına xidmət edən praktiki tədbirlərlə dəstəklənməsinin vacibliyi vurğulanıb.
Paneldə çıxış edən İRİA-nın İdarə Heyətinin sədri Fərid Osmanov rəqəmsal dövlət infrastrukturu və innovasiyaların yaşıl keçidə verdiyi töhfələrdən bəhs edib. O, rəqəmsal dövlət imkanlarından istifadə etməklə enerji və resurslardan daha səmərəli istifadənin təmin edilməsi, eləcə də yaxın illərdə iqlim məqsədlərinə xidmət edən praktiki rəqəmsal təşəbbüslərin həyata keçirilməsi imkanlarını diqqətə çatdırıb. İRİA rəsmisi həmçinin vurğulayıb ki, dövlət xidmətlərinin rəqəmsallaşdırılması və süni intellekt əsaslı həllərlə əhatə olunması kağızdan istifadənin, fiziki müraciətlərin və təkrarlanan inzibati proseslərin azalmasına, resurslardan daha səmərəli istifadəyə və nəticə etibarilə dövlət xidmətlərinin ətraf mühitə təsirinin minimuma endirilməsinə imkan yaradır.
İRİA-nın sədr müavini Şahin Əliyev isə Forum çərçivəsində keçirilən “Rəqəmsal transformasiya və süni intellekt: iqlimədavamlı kənd təsərrüfatının qurulması” sessiyasında iştirak edərək rəqəmsal transformasiya və süni intellektin kənd təsərrüfatında yarada biləcəyi imkanlarla bağlı fikirlərini bölüşüb. Çıxışı zamanı o bildirib ki, süni intellektə rəqəmsal transformasiyadan ayrıca bir istiqamət kimi deyil, onun növbəti mərhələsi kimi baxılmalıdır.
Müzakirələr nəticəsində dövlət, beynəlxalq təşkilatlar, özəl sektor və investorlar arasında əməkdaşlığın gücləndirilməsi, rəqəmsal və yaşıl innovasiyalara investisiyaların artırılması, uğurlu həllərin genişmiqyaslı tətbiqi və yerli ehtiyaclara uyğunlaşdırılması əsas prioritetlər kimi müəyyənləşdirilib.
Ümumilikdə, panel müzakirələri COP29 çərçivəsində formalaşmış iqlim gündəliyinin davam etdirilməsi, rəqəmsal transformasiya ilə yaşıl keçidin əlaqələndirilməsi və iqlim üzrə beynəlxalq öhdəliklərin praktiki icra mexanizmlərinin təşviqi baxımından əhəmiyyətli platforma kimi qiymətləndirilib.
Ən son xəbərləri səhifəmizdən də izləyin
