https://innews.az/uploads/news/2026-09/_innews_d5ef0f5707d51aebc12974a7b_o.jpg
Sentyabrın 8-də Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqı (ETİHİ) Respublika Komitəsinin təşkilatçılığı ilə Xaçmaz rayonunda yerləşən “Təhsil” İstirahət Mərkəzində “Şəhərsalma və Memarlıq İli” çərçivəsində “Şəhərsalma və Memarlıq: Gələcəyə Baxış” mövzusunda tədbir keçirilib. Tədbir Elm və Təhsil İşçiləri Həmkarlar İttifaqı Respublika Komitəsinin təşkilatçılığı ilə sentyabrın 7-dən 12-dək “Təhsil” İstirahət Mərkəzində keçirilən tələbə düşərgəsi çərçivəsində təşkil olunub.
Görüşdə Azərbaycan Dövlət Pedaqoji Universitetinin rektoru Cəfər Cəfərov, Azərbaycan Memarlıq və İnşaat Universitetinin rektoru Gülçöhrə Məmmədova, Azərbaycan Texniki Universitetinin rektoru Vilayət Vəliyev, Bakı Mühəndislik Universitetinin rektoru Yaqub Piriyev, Azərbaycan Əmək və Sosial Münasibətlər Akademiyasının rektoru vəzifəsini icra edən Fərid Babayev, Sumqayıt Dövlət Universitetinin rektoru Nurəli Yusifbəyli, Qarabağ Universitetinin rektoru Şahin Bayramov, Azərbaycan Neft və Sənaye Universitetinin rektoru Rüfət Əzizov, Bakı Slavyan Universitetinin rektoru Anar Nağıyev, Bakı Avrasiya Universitetinin rektoru Siyavuş Qasımov, Peşə Təhsili üzrə Dövlət Agentliyinin direktoru İlqar Bayramlı və 700-ə yaxın ali təhsil, orta ixtisas və peşə təhsili müəssisələrinin tələbələri iştirak ediblər.
Elm və Təhsil İşçiləri Həmkarlar İttifaqı Respublika Komitəsi sədrinin müavini Mirzə Cəfərzadə giriş sözü ilə çıxış edərək tədbirin məqsədi və “Şəhərsalma və Memarlıq İli”nin əhəmiyyəti barədə məlumat verib.
Daha sonra Elm və Təhsil İşçiləri Həmkarlar İttifaqı Respublika Komitəsinin sədri Araz Paşayev qonaqlara AHİK rəhbərliyinin səmimi salamlarını çatdırıb və son illərdə həmkarlar hərəkatında görülən işlərdən danışıb. ETİHİ Respublika Komitəsinin sədri, qarşıdakı illərdə bu cür düşərgələrin ixtisasyönümlü olacağını və tələbələrin asudə vaxtlarının səmərəli keçirilməsi istiqamətində daha innovativ layihələrin həyata keçiriləcəyini vurğulayıb.
Sonra dövlət agentliyinin sədri və ali təhsil müəssisələrinin rektorları çıxış edərək tələbə-gənclərlə fikirlərini bölüşüblər.
Çıxış edən ADPU-nun rektoru professor Cəfər Cəfərov tələbə-gənclərin müxtəlif layihə və təşəbbüslərdə fəal iştirakının, onların asudə vaxtının səmərəli təşkili ilə yanaşı, yeni bilik və bacarıqlar qazanmasına imkan yaradan təşəbbüslərin əhəmiyyətindən danışıb.
Rektor, eyni zamanda, müasir gəncin qarşısında duran əsas çağırışlara toxunaraq milli kimliyin qorunmasının, ana dilində düzgün və zəngin düşüncə və ünsiyyətin, rəqəmsal mühitdə məlumatı seçmək və texnologiyalardan məsuliyyətlə istifadə etmək bacarığının vacibliyini diqqətə çatdırıb. O qeyd edib ki, gələcəyin əmək bazarında peşələr və funksiyalar dəyişsə də, tənqidi düşüncə, yaradıcılıq, ünsiyyət, məsuliyyət və ömürboyu öyrənmə kimi insani keyfiyyətlər öz əhəmiyyətini qoruyacaq.
Professor Cəfər Cəfərov xüsusilə müəllimlik peşəsinin gələcəyin insanının formalaşdırılmasında strateji rol daşıdığını vurğulayıb. Rektor qeyd edib ki, müasir müəllimin əsas üstünlüyü yalnız məlumat çatdırmaq deyil, şagirdə məlumatı anlamağı, müqayisə etməyi, sual verməyi və məsuliyyətlə istifadə etməyi öyrətməkdir.
ADPU-nun missiyasının yalnız müəllim hazırlamaqla məhdudlaşmadığını bildirən rektor universitetin milli dəyərləri qoruyan, ana dilində peşəkar və akademik ünsiyyət qura bilən, rəqəmsal gələcəyi anlayan və yeni nəsli bu gələcəyə hazırlayan müəllimlər yetişdirməyə xüsusi əhəmiyyət verdiyini qeyd edib. Professor Cəfər Cəfərov çıxışını “Kimliyini qoru, ana dilində düşün və yarat, rəqəmsal dünyanı idarə et, gələcəyi gözləmə, onu sən qur” mesajı ilə yekunlaşdırıb.
Sonra prof. Cəfər Cəfərov düşərgədə iştirak edən ADPU tələbələri ilə görüşüb. Görüş zamanı tələbələrlə səmimi fikir mübadiləsi aparılıb, onların düşərgə ilə bağlı təəssüratları dinlənilib, təklif və fikirləri öyrənilib.
Daha sonra qonaqlar “Təhsil” İstirahət Mərkəzində ittifaq üzvləri üçün yaradılmış şəraitlə tanış olublar.
Ən son xəbərləri səhifəmizdən də izləyin
