Milli Dram Teatrında Dostoyevskinin “Dayının yuxusu” əsəri səhnəyə qoyuldu

16, 17 sentyabr Azərbaycan Dövlət Akademik Milli Dram Teatrında F.M.Dostoyevskinin “Dayının yuxusu” povesti əsasında eyniadlı tamaşanın premyerası keçirilib. Tamaşanın quruluşçu rejissoru, səhnələşdirmə müəllifi və musiqi tərtibatçısı Mikayıl Mikayılov, quruluşçu rəssamı Mustafa Mustafayev, işıq üzrə rəssamı Rəfael Həsənov, rejissor assistenti Fəridə Zülfüqarlıdır.

Yeni səhnə əsərində əməkdar artistlər Sənubər İsgəndərova, Ayşad Məmmədov, Elşən Rüstəmov, aktyorlar Cavidan Novruzov, Lalə Süleymanova, Nərminə Məhərrəmova, Nigar Güləhmədova, Rada Nəsibova, Xədicə Bayramlı, Güney Əkbərova iştirak edirlər.

F.M.Dostoyevskinin 1859-cu ildə qələmə aldığı “Dayının yuxusu” povestində hadisələr kiçik əyalət şəhərində baş verir. Əsərin mərkəzində hiyləgər və ambisiyalı qadın — Marya Aleksandrovna dayanır. O, qızı Zinanı varlı və yaşlı knyazla evləndirmək istəyir. Şəhərə gələn knyaz bir qədər qəribə, yaddaşı zəif və asan təsir altına düşən adamdır. Marya Aleksandrovna knyazı inandırır ki, onun qızına evlilik təklif edib. Lakin hadisələr dolaşıq hal alır: knyaz ayılanda hər şeyi “yuxu” kimi xatırladığını deyir. Bu isə böyük qalmaqala və komik vəziyyətlərə səbəb olur.