Sumqayıtda iki təkər üzərində dəyişiklik çağırışı

Sumqayıtda keçirilən veloyürüşə yolboyu onu görüb qoşulan sakinlər də olub. Beləcə, sağlam və aktiv həyat tərzini təşviq edən təşəbbüs yeni iştirakçılar qazanıb.

22 sentyabr Ümumdünya Avtomobilsiz Günü münasibətilə təşkil olunan veloyürüş Sağlam Düşüncə Gənclər Təşkilatı və Abşeron-Xızı Regional İdman İdarəsinin birgə əməkdaşlığı ilə baş tutub. Tədbirin əsas məqsədi Sumqayıtın veloşəhərə çevrilməsinə töhfə vermək və gəncləri daha fəal həyat tərzinə həvəsləndirmək olub.

Veloyürüş şəhər sakinlərini ortaq bir ideya ətrafında birləşdirib: gündəlik həyatda hərəkətə və velosipedə daha çox yer ayırmaq. Yürüşü kənardan izləyərkən ona qoşulmağa qərar verən sakinlərin iştirakı da bu çağırışa marağın göstəricisi olub.

Təşkilatçılar Sumqayıtda velosiped mədəniyyətinin inkişafı və şəhərin velosipedçilər üçün daha əlverişli məkana çevrilməsi istiqamətində təşəbbüslərini davam etdirməyi nəzərdə tuturlar.