https://innews.az/uploads/news/2026-09/_innews_69da938d99085aeaf22c15cba_o.jpg
Azərbaycan Respublikası Mədəniyyət Nazirliyinin, Şəki Şəhər İcra Hakimiyyətinin, Azərbaycan Teatr Xadimləri İttifaqının və Şəki Dövlət Dram Teatrının dəstəyi və iştirakı ilə V Şəki Beynəlxalq Teatr Festivalı keçiriləcək.
1–5 oktyabr tarixlərində Şəki şəhərində baş tutacaq festivalda Qazaxıstan, Özbəkistan və İrandan teatr kollektivləri iştirak edəcək. Azərbaycan festivalda Şəki Dövlət Dram Teatrı və Azərbaycan Dövlət Pantomim Teatrının tamaşaları ilə təmsil olunacaq.
1 oktyabr – Festivalın açılış günündə Şəki Dövlət Dram Teatrı Türk dünyasının görkəmli dramaturqu Tuncer Cücenoğlunun “Uçqun” əsəri əsasında hazırlanmış eyniadlı tamaşanı təqdim edəcək. Əməkdar incəsənət xadimi Mirbala Səlimlinin quruluş verdiyi tamaşada insanın daxilindəki qorxu hissinə qalib gəlməsi mövzusu ön plana çəkilir.
2 oktyabr – Festivalın ikinci günündə Qazaxıstan Respublikasının Nartay Bekejanov adına Kızılorda Vilayət Qazax Akademik Musiqili Dram Teatrı rus dramaturqu Aleksandr Ostrovskinin “Tufan” pyesi əsasında hazırlanmış eyniadlı tamaşanı nümayiş etdirəcək. Dina Jumabayevanın quruluş verdiyi səhnə əsərində daxili mübarizə, ağrı və cəmiyyətin yaratdığı buxovlardan azad olmaq istəyən qadının hekayəsi əks olunur.
3 oktyabr – Festivalın üçüncü günündə Azərbaycan Dövlət Pantomim Teatrı rus ədəbiyyatının klassiklərindən Nikolay Qoqolun “Şinel” povesti əsasında səhnələşdirilmiş eyniadlı tamaşanı təqdim edəcək. Ceyhun Dadaşovun quruluş verdiyi tamaşada şinel müxtəlif insanların əlinə keçir. Səhnə əsərində ona sahib olan insanın cəmiyyətdə daha çox diqqət, hörmət və sevgi qazandığı göstərilir.
4 oktyabr – Festivalın dördüncü günündə İran İslam Respublikasının Ərdəbil Moqan Honar Teatrı iranlı dramaturq Arif Məhtabın müəllifi olduğu “İçimdə bir Araz addımlayır” tamaşası ilə çıxış edəcək. Qərib Mənuçehrinin quruluş verdiyi səhnə əsərində gənc qadının həsrəti və gözləntisi, gənc kişinin vətəninə qayıdana qədər illərlə çəkdiyi əziyyət və onların qovuşa bilməməsi təsvir olunur.
5 oktyabr – Festivalın bağlanış günündə Özbəkistan Dövlət Gənc Tamaşaçılar Teatrı “Məsxərəboz-Şou” tamaşasını təqdim edəcək. Məsxərəbazların iştirakı ilə meydan tamaşası üslubunda hazırlanan səhnə əsərində xalqın adət-ənənələri şıltaqlıq, yumor və coşqu ilə nümayiş etdirilir.
Beləliklə, beş gün davam edəcək V Şəki Beynəlxalq Teatr Festivalı Azərbaycan, Qazaxıstan, İran və Özbəkistanın teatr kollektivlərini bir araya gətirərək müxtəlif janrlı teatr ənənələrinin və səhnə nümunələrinin nümayişinə geniş imkan yaradacaq.
Ən son xəbərləri səhifəmizdən də izləyin
