https://innews.az/uploads/news/2026-10/_innews_7b51110dc182c707768e77d8b_o.jpg
Azərbaycan Dövlət Pedaqoji Universiteti (ADPU) ilə ABŞ-nin nüfuzlu Corc Vaşinqton Universiteti (CVU) arasında həyata keçirilən ikili diplom proqramının Katibliyinin təşkilatçılığı ilə ADPU-nun struktur rəhbərləri üçün təşkil olunmuş Peşəkar İnkişaf Təliminin davamı olaraq Corc Vaşinqton Universitetinin Təhsil və İnsan İnkişafı Məktəbinin Kommunikasiya direktoru Turan Vaters tərəfindən ADPU-nun struktur rəhbərləri və strukturlar üzrə mediaya məsul şəxsləri üçün strateji kommunikasiya mövzusunda xüsusi təlim keçirilib.
Təlim çərçivəsində strateji kommunikasiyanın müasir ali təhsil müəssisələrinin fəaliyyətində rolu, institusional kommunikasiya strategiyasının formalaşdırılması, müxtəlif auditoriyalarla effektiv kommunikasiya, media ilə əlaqələrin düzgün qurulması və kommunikasiya fəaliyyətinin vahid institusional yanaşma əsasında təşkili məsələləri diqqət mərkəzində olub.
İnteraktiv formatda keçirilən təlimdə iştirakçılara kommunikasiya proseslərinin planlaşdırılması, əsas mesajların müəyyənləşdirilməsi, media ilə münasibətlərin idarə olunması, institusional reputasiyanın qorunması və böhran vəziyyətlərində kommunikasiya yanaşmaları ilə bağlı beynəlxalq təcrübəyə əsaslanan məlumatlar təqdim edilib. Eyni zamanda, ali təhsil müəssisələrində kommunikasiya fəaliyyətinin daha səmərəli təşkili və struktur bölmələri arasında koordinasiyanın gücləndirilməsi istiqamətində praktiki nümunələr üzərində fikir mübadiləsi aparılıb.
Təlim qarşılıqlı fikir mübadiləsi şəraitində davam edib, iştirakçıların sualları cavablandırılıb və strateji kommunikasiyanın ADPU-nun institusional inkişaf prosesində daha effektiv tətbiqi ilə bağlı müzakirələr aparılıb.
Qeyd edək ki, ADPU ilə Corc Vaşinqton Universiteti arasında ikili diplom proqramı çərçivəsində həyata keçirilən bu kimi peşəkar inkişaf təşəbbüsləri universitet əməkdaşlarının müasir idarəetmə və kommunikasiya bacarıqlarının inkişafına, beynəlxalq təcrübənin institusional fəaliyyətə inteqrasiyasına və universitetin beynəlxalq tərəfdaşlıqlarının genişləndirilməsinə xidmət edir.
Ən son xəbərləri səhifəmizdən də izləyin
