https://innews.az/uploads/news/2026-10/_innews_537621867525ea4c2c1cb2480_o.jpg
Rəqəmsal dövlət xidmətlərinin vahid platformada təqdim olunması məqsədilə “mygov”da Ədliyyə Nazirliyinin notariat xidmətlərinin əhatə dairəsi genişləndirilib.
Artıq vətəndaşlar daşınmaz əmlak üzrə səlahiyyətlərini digər şəxsə həvalə etmək üçün “mygov” üzərindən “Daşınmaz əmlaka sərəncam etibarnaməsinin verilməsi” xidmətindən istifadə edə bilərlər. Buraya əmlakın özgəninkiləşdirilməsi, ipotekaya verilməsi və digər sərəncam əməliyyatları üzrə səlahiyyətlərin digər şəxsə həvalə edilməsi daxildir.
“Daşınmaz əmlaka sərəncam ərizəsi” xidməti isə daşınmaz əmlak üzərində müəyyən hüquq və səlahiyyətlərin digər şəxsə ötürülməsinə mülkiyyətçinin razılığının elektron qaydada rəsmiləşdirilməsini təmin edir.
Mülkiyyətçi həmçinin “Yaşayış sahəsində qeydiyyata alınma ərizəsi” xidməti vasitəsilə digər şəxslərin həmin ünvanda qeydiyyata alınmasına razılığını “mygov”da elektron qaydada təsdiq edə bilər.
Bundan əlavə, “Vərəsəlik etibarnaməsinin verilməsi” xidməti vasitəsilə vətəndaşlar vərəsəlik işləri üzrə sənədlərin toplanması və miras əmlakın rəsmiləşdirilməsi üçün səlahiyyətlərini digər şəxsə elektron qaydada həvalə edə bilərlər.
Müxtəlif məzmunlu ərizələrin elektron qaydada rəsmiləşdirilməsinə imkan verən daha iki xidmət də “mygov” platformasına inteqrasiya edilib.
Vətəndaşlar “Sərbəst məzmunlu ərizə” xidməti vasitəsilə “mygov”da notariat ərizələri kimi təqdim olunmayan digər ərizə növləri ilə bağlı müraciət ünvanlaya bilərlər. Bunun üçün əvvəlcə ərizənin ünvanlanacağı qurum seçilir, daha sonra ərizə mətni və zəruri sənədlər sistemə yüklənir. Məlumatların doğruluğu təsdiqləndikdən və ödəniş prosesi tamamlandıqdan sonra müraciət elektron qaydada təqdim olunur.
Vətəndaş daha əvvəl təqdim etdiyi ərizədən elektron qaydada “Ərizədən imtina ərizəsi” xidməti vasitəsilə imtina edə bilər. Bunun üçün imtina ediləcək ərizə seçilir, imtina səbəbi qeyd olunur və məlumatların doğruluğu yoxlanılır. Bütün mərhələlər yekunlaşdıqdan sonra müraciət aidiyyəti quruma elektron qaydada göndərilir.
“Əhalinin sağlamlığının qorunması haqqında” Azərbaycan Respublikasının Qanununa əsasən ödənişsiz və ya güzəştli dərman vasitələrinin vətəndaşın etibar etdiyi digər şəxs tərəfindən əldə olunması üçün “Dərmanların alınması üçün etibarnamənin verilməsi” xidməti də “mygov” platformasına inteqrasiya edilib. Xidmət üzrə əvvəlcə vətəndaşın güzəştli dərman almaq hüququ sistem üzərindən yoxlanılır, daha sonra vətəndaşın məlumatlarının doğruluğu təsdiqlənir. Ödəniş mərhələsi başa çatdıqdan sonra müraciət elektron qaydada təqdim olunur.
Qeyd olunan bütün xidmətlər üzrə vətəndaşların müraciətləri notariat qaydasında rəsmiləşdirilir.
Vətəndaşlar sözügedən xidmətlərdən həm my.gov.az portalı, həm də “mygov” mobil tətbiqi vasitəsilə yararlana bilərlər.
Ən son xəbərləri səhifəmizdən də izləyin
