https://innews.az/uploads/news/2026-10/_innews_01051326fa2306242c06bd059_o.jpg
V Şəki Beynəlxalq Teatr Festivalının ikinci günü - oktyabrın 2-də Qazaxıstan Respublikasının Nartay Bekejanov adına Kızılorda Vilayət Qazax Akademik Musiqili Dram Teatrı rus dramaturqu Aleksandr Ostrovskinin “Tufan” pyesi əsasında hazırlanmış eyniadlı tamaşanı təqdim edib.
Səhnə əsərində daxili mübarizə, ağrı və cəmiyyətin yaratdığı buxovlardan azad olmaq istəyən qadının hekayəsi əks olunur.
Səhnə əsərinin quruluşçu rejissoru Dina Jumabayeva, quruluşçu rəssamı Aynur Esbolatova, bəstəkarı Nursultan Töreəlidir.
Səhnə əsərində rolları Qazaxıstan Respublikasının Əməkdar xadimi Zalipa Tulepova, Qazaxıstan Respublikasının Əməkdar mədəniyyət işçisi Uğım Baymaxanov, aktyorlar Sanat Juzbay, Bayan Kali, Jauhar Yerkinova, Azidolla Azimtay, Nurseyit Sızdıkbayev, Sultanbek Bissenaliyev, Askar Orazaliyev, Janıl Raxmetova ifa ediblər. Tamaşa festival qonaqları və teatrsevər tamaşaçılar tərəfindən maraqla və böyük alqışlarla qarşılanıb. Tamaşanın nümayişindən sonra festivalın bədii rəhbəri, Əməkdar incəsənət xadimi Mirbala Səlimli Şəki Dövlət Dram Teatrı adından Qazaxıstan teatrının rəhbərliyinə xatirə hədiyyəsi təqdim edib. Festivalın simvolu Mədəniyyət Nazirliyinin İncəsənət siyasəti şöbəsinin İfa sənətləri sektorunun müdiri Böyükxanım Talıbova tərəfindən Kızılorda Vilayət Qazax Akademik Musiqili Dram Teatrının bədii rəhbəri, Qazaxıstan Respublikasının Əməkdar incəsənət xadimi Baxıtbek Temirbekova təqdim olunub. Şəki Şəhər İcra Hakimiyyəti tərəfindən isə Qazaxıstan teatr kollektivinə Təşəkkürnamə təqdim edilib. Beləliklə, V Şəki Beynəlxalq Teatr Festivalının növbəti gününə də yekun vurulub.
Ən son xəbərləri səhifəmizdən də izləyin
