Şəkidə Dövlət Pantomim Teatrı Qoqolun "Şinel" povestini səhnələşdirdi

V Şəki Beynəlxalq Teatr Festivalının üçüncü günü - oktyabrın 3-də Azərbaycan Dövlət Pantomim Teatrının yaradıcı heyəti rus ədəbiyyatının klassiklərindən Nikolay Qoqolun "Şinel" povesti əsasında səhnələşdirilmiş tamaşanı təqdim etdi.

Ceyhun Dadaşovun quruluş verdiyi tamaşada şinel müxtəlif insanların əlinə keçir. Səhnə əsərində ona sahib olan insanın cəmiyyətdə daha çox diqqət, hörmət və sevgi qazandığı göstərilir. Tamaşanın rəqslərinin quruluşu Elnur İsmayılov və Ceyhun Dadaşova məxsusdur. Səhnə əsərində rolları Əməkdar artist Nargilə Qəribova, Elnur İsmayılov, Əli Əlizadə, Nuridə Musabəyli, Cavad Nuriyev, Hilal Dəmirov, Nurlan Süleymanlı, Zəhra Hüseynova ifa ediblər. Tamaşa festival qonaqları və teatrsevər tamaşaçılar tərəfindən maraqla və böyük alqışlarla qarşılanıb. Tamaşanın nümayişindən sonra festivalın simvolu Azərbaycan Respublikası Mədəniyyət Nazirliyinin İncəsənət siyasəti şöbəsinin İfa sənətləri sektorunun müdiri Böyükxanım Talıbova tərəfindən "Şinel" tamaşasının quruluşçu rejissoru Ceyhun Dadaşova təqdim edilib. Şəki Şəhər İcra Hakimiyyəti tərəfindən isə teatrın kollektivinə Təşəkkürnamə və xatirə hədiyyəsi təqdim edilib.

Beləliklə, V Şəki Beynəlxalq Teatr Festivalının növbəti gününə də yekun vurulub.