Şəkidə beynəlxalq teatr festivalında İran tamaşası: “İçimdə bir Araz addımlayır” böyük alqışlarla qarşılandı

V Şəki Beynəlxalq Teatr Festivalının dördüncü günü – oktyabrın 4-də İran İslam Respublikasının Ərdəbil Moqan Honar Teatrı Arif Məhtabın müəllifi olduğu “İçimdə bir Araz addımlayır” tamaşasını təqdim edib.

Qərib Mənuçehri tərəfindən quruluş verilən səhnə əsərində gənc qadının həsrəti və gözləntisi, gənc kişinin vətəninə qayıdana qədər illərlə çəkdiyi əziyyət, eləcə də onların bir-birinə qovuşa bilməməsi təsvir olunur.

Tamaşada rolları aktyorlar Davər Fərmani və Nəstəran Əkbərzadə ifa ediblər. Tamaşanın musiqi və vokal həlli Yaşar Haşimiyə məxsusdur.

Səhnə əsəri festival qonaqları və teatrsevərlər tərəfindən maraqla qarşılanıb. Tamaşanın nümayişindən sonra festivalın simvolu Mədəniyyət Nazirliyinin İncəsənət siyasəti şöbəsinin İfa sənətləri sektorunun müdiri Böyükxanım Talıbova tərəfindən Ərdəbil Moqan Honar Teatrının rəhbərliyinə təqdim olunub. Şəki Şəhər İcra Hakimiyyəti tərəfindən teatr kollektivinə Təşəkkürnamə və xatirə hədiyyəsi verilib.

Eyni zamanda, festivalın bədii rəhbəri, Əməkdar incəsənət xadimi Mirbala Səlimliyə İran tamaşasının quruluşçu rejissoru Qərib Mənuçehri tərəfindən xatirə hədiyyəsi təqdim edilib.

Beləliklə, V Şəki Beynəlxalq Teatr Festivalının daha bir günü maraqlı səhnə əsəri və qarşılıqlı mədəni mübadilə ilə başa çatıb.