https://innews.az/uploads/news/2026-10/_innews_9a3753999753bc7da3c5f6dab_o.jpg
Kəngərli Rayon İcra Hakimiyyətinin və "Naxçıvan Şəhid Ailələri" İctimai Birliyinin təşkilatçılığı ilə 27 Sentyabr – Anım Günü münasibətilə Kəngərli Rayon Mədəniyyət Sarayında tədbir keçirilib.
Tədbirdə əvvəlcə Azərbaycan Respublikasının Dövlət Himni səsləndirilib, xalqımızın Ümummilli Lideri Heydər Əliyevin və Azərbaycanın ərazi bütövlüyü və suverenliyi uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.
Tədbirdə çıxış edən Kəngərli Rayon İcra Hakimiyyətinin başçısı Kamal Ələkbərov bildirib ki, 27 Sentyabr – Anım Günü Azərbaycan xalqının yaddaşında xüsusi yer tutan müqəddəs tarixlərdəndir. Bu gün Vətənimizin ərazi bütövlüyü uğrunda canından keçmiş şəhidlərimizin əziz xatirəsinə dərin ehtiramın ifadəsidir.
İcra başçısı qeyd edib ki, 2020-ci il sentyabrın 27-də başlayan Vətən müharibəsi Azərbaycan xalqının uzun illər ərzində yaşadığı torpaq həsrətinə son qoyan tarixi Zəfərin başlanğıcı oldu. Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun 44 gün ərzində nümayiş etdirdiyi misilsiz qəhrəmanlıq və peşəkarlıq nəticəsində işğal altında olan torpaqlarımız azad edildi, ölkəmizin ərazi bütövlüyü bərpa olundu.
Kəngərli rayonunun Vətən müharibəsində iştirak edən igid oğullarının da böyük qəhrəmanlıq göstərdiyini qeyd edən İcra başçısı onların döyüş yolunun rayon sakinləri üçün qürur mənbəyi olduğunu diqqətə çatdırıb.
Tədbirdə Naxçıvan Şəhid Ailələri İctimai Birliyinin sədri Mayis Gülməmmədov, müharibə iştirakçısı, qazi kapitan Ülvi Abbaszadə, şəhid atası Səmrəddin Əhmədov və şəhid anası Aynurə İbrahimova çıxış ediblər. Natiqlər öz çıxışlarında 44 günlük Vətən müharibəsində Azərbaycan əsgərinin göstərdiyi misilsiz şücaətdən, Vətən torpaqlarının hər qarışını müqəddəs bilib qanları ilə tarix yazan qəhrəman şəhidlərimizin keçdiyi şanlı döyüş yolundan geniş söz açıblar.
Tədbirin davamında Kəngərli rayonundan olan I və II Qarabağ müharibələrində şəhid olmuş qəhrəmanların xatirəsinə həsr olunmuş videoçarx nümayiş etdirilib.
Kəngərli Rayon Mədəniyyət Sektorunun əməkdaşlarının iştirakı ilə “Biz şəhidlərin bacısıyıq” adlı ədəbi-bədii kompozisiya təqdim olunub.
Sonda 44 günlük Vətən müharibəsinin tarixi anlarını, Azərbaycan Ordusunun döyüş yolunu və şəhidlərin əziz xatirəsini əks etdirən sənədli film nümayiş olunub.
Ən son xəbərləri səhifəmizdən də izləyin
