https://innews.az/uploads/news/2026-10/_innews_a0aedb1f756a1fa1b67520baf_o.jpg
Azərbaycanlı bəstəkar Xədicə Zeynalova ölkəmizi Almaniyanın Leypsiq şəhərində "chor.com 2026" Beynəlxalq Konqres çərçivəsində təmsil edərək mədəniyyətlərarası musiqi workşopuna rəhbərlik edib.
Leypsiq, 4 oktyabr 2026-cı il. Almaniyanın Leypsiq şəhərində 1-4 oktyabr 2026 tarixlərində keçirilən "chor.com 2026" beynəlxalq musiqi konfransı çərçivəsində "Interkulturelle Brückenbauerinnen – Mədəniyyətlərarası körpülər quran qadınlar" adlı xüsusi Workşop təşkil olunub. Worksop azərbaycanlı bəstəkar, musiqişünas alim və dosent Dr. Xədicə Zeynalova dəvətli lektor olaraq çıxış edib.
Beynəlxalq Konfransda bəstəkar Xədicə Zeynalova ilə yanaşı, ABŞ-dan bəstəkar Lea Moris və Braziliyadan bəstəkar Andrea Botelho də çıxış etmişlər. Xədicə Zeynalova öz yaradıcılıq və peşəkar təcrübəsini iştirakçılarla bölüşərək, o, zəngin Azərbaycan musiqi mədəniyyətini, bəstəkarlıq fəaliyyətini və uzun illərdir həyata keçirdiyi mədəniyyətlərarası layihələri təqdim etdi.
Qeyd edık ki chor.com Alman Xor Assosiasiyası (Deutscher Chorverband) tərəfindən 2011-ci ildən başlayaraq iki ildən bir keçirilir və vokal musiqisi sahəsində Avropanın ən böyük ixtisaslaşdırılmış konqres, konfrans və sərgi platformalarından biridir. Tədbirdə bəstəkarlar, xor dirijorları, musiqi pedaqoqları, musiqişünaslar, musiqiçilər və xor menecerləri üçün 150-dən çox seminar, Worksop, ustad dərsi və kurs, həmçinin sərgi və konsert proqramı təqdim olunur.
2026-cı ildə tədbir ilk dəfə Almaniyanın Leypsiq şəhərində, "Building Bridges" (Körpülərin salınması) şüarı altında keçirildi. Seminarlar və Worksoplar Leypsiq Xalq Universitetində (Volkshochschule Leipzig) təşkil olunmuşdur.
Xədicə Zeynalova 4 oktyabrda keçirilən beynəlxalq konfransda öz yaradıcılıq və peşəkar təcrübəsini iştirakçılarla bölüşərək, bəstəkar zəngin Azərbaycan musiqi mədəniyyətini, bəstəkarlıq fəaliyyətini və uzun illərdir həyata keçirdiyi mədəniyyətlərarası layihələri təqdim edib. Beynəlxalq Konfransda musiqi vasitəsilə mədəniyyətlərarası dialoqun qurulması, fərqliliklərin zənginlik kimi qəbul edilməsi, qarşılıqlı anlaşma və sülh üçün musiqinin rolu müzakirə olunub.
Onun rəhbərlik etdiyi "Bridge of Sound" beynəlmiləl ansamblının və yaratdığı Beynəlxalq “Harmony of Sound” Musiqi Festivalının fəaliyyəti də bu baxımdan nümunə kimi təqdim olunub.
"Azərbaycanlı bəstəkar və musiqişünas olaraq, iki ildən bir keçirilən, Avropanın ən böyük və nüfuzlu konqreslərindən biri olan chor.com-da azərbaycanlı bəstəkar və musiqişünas kimi çıxış etmək və vətənimi təmsil etmək mənim üçün böyük qürur və fəxr mənbəyidir", – deyə Xədicə Zeynalova bildirib.
O əlavə edib: "Musiqi sərhəd tanımır. O, insanları birləşdirir, mədəniyyətlərarası körpülər, xalqlararası dostluq yaradır və qarşılıqlı anlaşmaya yol açır."
Dr. Xədicə Zeynalova Bakı Musiqi Akademiyası, Detmold Konservatoriyası (Hochschule für Musik Detmold) və Paderborn Universitetinin məzunudr.
Bəstəkar sənətşünaslıq üzrə fəlsəfə doktorudur. O, ilk Azərbaycanlı bəstəkar və Musiqişünas olaraq alman dilində “Azərbaycanın 20-ci əsr musiqi mədəniyyəti və onun qərb musiqisində təzahürü” adlı 400 səhifəlik elmi işi - Dissertasiyası Paderborn Universitetində müdafiə olunub və Peter Lang Verlag nəşriyyatında çap edilmişdir. O, 45-dən çox elmi kitab, məqalə və dərsliyin müəllifidir. Əsərləri Almaniya, Hollandiya, İngiltərə, Azərbaycan, Yaponiya, Türkiyə və digər ölkələrdə nəşr olunub.
Xədicə Zeynalova Almaniyada "Bridge of Sound" beynəlmiləl ansamblının təsisçisi və bədii rəhbəri, eyni zamanda "Harmony of Sound" Beynəlxalq Musiqi Festivalının təsisçisi, kuratoru və bədii rəhbəridir. Bu layihələrdə Azərbaycan, Avropa və dünyanın müxtəlif musiqi mədəniyyətləri bir araya gətirilir.
Bəstəkar bir sıra təltiflərə layiq görülüb:
- 2026-cı ilin yanvarında Azərbaycan Respublikasının "Tərəqqi" medalı;
- 2025-ci ildə Azərbaycan Mədəniyyət Elçilərinin I Forumunda Fəxri Fərman;
- 2024-cü ildə Almaniyada "Artist in Residence" nominasiyasına layiq görülərək "İlin bəstəkarı" adı;
- 2022-ci ildə Şuşada keçirilən Dünya Azərbaycanlılarının V Qurultayı çərçivəsində medal, həmçinin Nizami Gəncəvi adına medal.
Xədicə Zeynalovanın yaradıcılığının əsas istiqamətlərini Azərbaycan və Qərb musiqi ənənələrinin sintezi, mədəniyyətlərarası dialoq, sülh və tolerantlığın musiqi vasitəsilə təşviqi təşkil edir. Leypsiqdəki konfransdakı çıxışı Azərbaycan musiqisinin Almaniyanın və Avropanın peşəkar musiqi mühitində tanıdılması baxımından da mühüm addım kimi qiymətləndirilir.
Ən son xəbərləri səhifəmizdən də izləyin
