https://innews.az/uploads/news/2026-10/_innews_d857e5a7debff919aa3fc9363_o.jpg
Bərdədə 10 baş mal-qaranı sığortalamaq neçəyə başa gəlir? – 360 MANAT
Qarşıdan gələn qış mövsümü təkcə əkin sahələri üçün deyil, heyvandarlıq təsərrüfatları üçün də yüksək risk dövrüdür. Soyuq havalarda təsərrüfatı qızdırmaq üçün istifadə olunan qızdırıcılar bəzi hallarda yanğına və heyvanların tələf olmasına səbəb olur.
Digər tərəfdən, qışda yem tapmaq çətinləşdiyindən təsərrüfatlara vəhşi heyvanların hücumları qat-qat artır və bu da fermerlərə böyük zərər vurur.
Hər il, xüsusilə qış mövsümündə təsərrüfatlarda onlarla yanğın və vəhşi heyvan hücumları qeydə alınır.
Fermerlər belə hallardan mal-qaranı sığortalamaqla qoruna bilərlər.
Mal-qara saxlayan fermerlər öz təsərrüfatlarındakı iribuynuzlu heyvanları Aqrar Sığorta Fondunda sərfəli şərtlərlə sığortalaya bilərlər. Dövlət dəstəyi ilə tətbiq olunan aqrar sığorta mexanizmi çərçivəsində inək və camışlarla yanaşı, qoyun və keçilərin də sığortalanması mümkündür. Bu zaman sığorta haqqının yarısını fermerin yerinə dövlət ödəyir.
Azərbaycanda ən çox iribuynuzlu heyvan olan rayonlardan biri Bərdədir. Bu rayonda ümumilikdə 110 min başlan artıq iribuynuzlu heyvan saxlanılır. Yuxarıda göstərilən şərtləri nəzərə alanda, məsələn, Bərdə rayonunda qiyməti 1500 manat olan 1 baş iribuynuzlu heyvanın 1 il müddətinə sığortalanması fermer üçün 36 manata başa gəlir. Sığortanın ümumi haqqı 72 manat təşkil edir. Dövlət tərəfindən sığorta haqqının 50 faizi ödənildiyindən fermerin ödəyəcəyi məbləğ 36 manat təşkil edir.
Aqrar sığorta çərçivəsində iribuynuzlu heyvanlar təbii fəlakətlər, yoluxucu xəstəliklər, ot və yemdən zəhərlənmə, ilan və həşərat sancması, yanğın, vəhşi heyvanların hücumu, üçüncü şəxslərin hərəkətləri və digər risklərdən sığortalana bilər.
Bu hesabla Bərdədə 10 baş iribuynuzlu heyvanın ümumi sığorta dəyəri 15000 manat təşkil edir və onların bir il müddətinə sığortalanması fermerə cəmi 360 manata başa gəlir.
Sığorta hadisəsi baş verdikdə ödəniş hesablanarkən müqavilədə nəzərdə tutulan 10 faizlik azadolma məbləği nəzərə alınır. Məsələn, sığorta dəyəri 1500 manat olan iribuynuzlu heyvan tələf olduqda 150 manat azadolma məbləği çıxılır və fermerə 1 350 manat sığorta ödənişi verilir.
Heyvanların illik sığortalanmasına çəkilən 36 manat (ayda cəmi 3 manat) məbləğ, heyvanların saxlanması üçün illik xərclərdən qat-qat aşağıdır və fermerə maliyyə yükü yaratmır.
Başqa sözlə, Bərdədə 10 heyvanın sığortalanmasına 360 manat ödəyən fermer, cəmi 1 heyvan tələf olduqda belə, ödədiyi pulu təqribən 4 qat ygeri qaytarır və fəaliyyətini davam etdirə bilir.
Ən son xəbərləri səhifəmizdən də izləyin
