https://innews.az/uploads/news/2026-10/_innews_e9c60a9c2219223c6efcb599f_o.jpg
Avropa İttifaqının (Aİ) Azərbaycandakı Nümayəndəliyi Aİ-yə Üzv Dövlətlərin Səfirlikləri ilə birgə ənənəvi “Avropa Təamları” Kulinariya Festivalının 4-cü buraxılışını 3 oktyabr 2026-cı il tarixində keçirəcək. Festival Azərbaycan ictimaiyyətinə kulinariya ustad dərsləri, viktorinalar, musiqi və digər fəaliyyətlər vasitəsilə Avropa mətbəxi, mədəniyyəti və ənənələri ilə tanış olmaq və onları kəşf etmək imkanı yaradacaq.
Avropa mətbəxinə maraq göstərən, kulinariya ustad dərslərində və viktorinalarda iştirak etmək istəyən hər kəs 3 oktyabr tarixində saat 12:00-dan 18:00-dək, Hilton Hotel-ində (Azadlıq prospekti 1B), “Taste of Europe” Kulinariya Festivalına dəvətlidir. Avstriya, Belçika, Xorvatiya, Fransa, Almaniya, Polşa, Portuqaliya, Slovakiya və İspaniyanın səfirlikləri öz ölkələrinin milli mətbəx nümunələrini festival iştirakçılarına təqdim edəcəklər.
Aİ Nümayəndəliyinin stendində tanınmış qida bloqerləri Elmira Qədirova və Nəzakət Cəfərovanın (Nazlinin_mətbəxi) iştirakı ilə kulinariya ustad dərsləri keçiriləcək. Aİ layihəsindən faydalanmış yerli fermerlər də festivalda iştirak edərək üzvi qida məhsullarını nümayiş etdirəcək və satışa çıxaracaqlar.
Aİ-nin Azərbaycan Respublikasındakı səfiri Mariana Kuyundjiç bildirib: “Bakıda “Avropa Təamları” Kulinariya Festivalının 4-cü buraxılışını təşkil etməkdən böyük məmnunluq duyuruq. Azərbaycanlı dostlarımızı Avropa ləzzətlərindən və mədəniyyətindən birlikdə zövq almağa dəvət edirik! Bu tədbir Avropa ölkələrinin milli mətbəxləri, mədəniyyətləri və ənənələri ilə tanış olmaq, yeni dadları kəşf etmək, ailə və dostlarla unudulmaz gün keçirmək üçün gözəl fürsətdir. Xüsusilə bu tədbirin Aİ ilə Azərbaycan arasında tərəfdaşlığın 30 illiyinə həsr olunmuş silsilə tədbirlər çərçivəsində keçirildiyini qeyd etməkdən qürur duyuram.”
Tədbir zamanı viktorinaların qalibləri “Taste of Europe” kitabı da daxil olmaqla müxtəlif hədiyyələr qazanmaq imkanı əldə edəcəklər. Aİ Nümayəndəliyi tərəfindən nəşr olunan kitabda Aİ-yə üzv olan 27 dövlətin ənənəvi reseptləri Azərbaycan dilinə tərcümə olunaraq təqdim edilir. Kitabın elektron versiyası da Aİ Nümayəndəliyinin internet səhifəsində mövcuddur.
Festival çərçivəsində tədbirdən əvvəl “Azeri Home Chef” Facebook səhifəsi tərəfindən təşkil olunan Avropa yeməkləri üzrə kulinariya müsabiqəsinin və rəsm müsabiqəsinin qalibləri də mükafatlandırılacaq. Festival zamanı Azərbaycan və Avropa dillərində çıxış edən yerli musiqiçilərin iştirakı ilə konsert proqramı da təşkil olunacaq.
Ən son xəbərləri səhifəmizdən də izləyin
