https://innews.az/uploads/news/2026-10/_innews_1b6bfbb8e7e311983f23f429e_o.jpg
“AzərEnerji” ASC-də 20 Oktyabr – Energetiklər Günü münasibətilə bayram tədbiri keçirilib. Tədbirdə ölkənin enerji sisteminin inkişaf yolu, energetika sahəsində əldə olunan nailiyyətlər və qarşıda duran strateji hədəflər diqqətə çatdırılıb.
Dövlət Himninin səsləndirilməsi ilə başlayan tədbirdə qeyd olunub ki, 20 oktyabr tarixi 2004-cü ildən etibarən Azərbaycanda Energetiklər Günü kimi qeyd edilir. Peşə bayramı Prezident İlham Əliyevin 13 oktyabr 2004-cü il tarixli 446 nömrəli Sərəncamı ilə təsis olunub.
Bu əlamətdar tarixin seçilməsi isə ölkənin energetika tarixində mühüm hadisə ilə bağlıdır. Belə ki, 1981-ci il oktyabrın 20-də Ulu Öndər Heydər Əliyevin təşəbbüsü və bilavasitə rəhbərliyi ilə Cənubi Qafqazın ilk böyük istilik elektrik stansiyası olan “Azərbaycan” İstilik Elektrik Stansiyasının (İES) birinci enerji bloku istifadəyə verilib. Tədbir çərçivəsində energetika sahəsinin inkişaf yolunu əks etdirən “Energetika memarlığı” filmi də nümayiş olunub.
Tədbirdə çıxış edən “AzərEnerji” ASC-nin İdarə Heyətinin sədri Baba Rzayev ölkənin enerji sektorunda həyata keçirilən islahatların və müasirləşmə prosesinin əhəmiyyətindən danışıb. Bildirib ki, Prezident İlham Əliyevin müəyyən etdiyi enerji siyasətinə uyğun olaraq müasir generasiya güclərinin yaradılması, rəqəmsal idarəetmə texnologiyalarının tətbiqi, bərpa olunan enerji mənbələrinin inkişafı və beynəlxalq enerji bağlantılarının genişləndirilməsi istiqamətində işlər uğurla davam etdirilir.
Baba Rzayev vurğulayıb ki, müasir dövrdə enerji təhlükəsizliyi yalnız elektrik enerjisinə olan tələbatın ödənilməsi ilə məhdudlaşmır. Elektrik enerjisinin fasiləsiz və səmərəli istehsalı, etibarlı ötürülməsi, istehlakın çevik idarə olunması, ətraf mühitə təsirlərin azaldılması və rəqəmsal texnologiyalar vasitəsilə enerji sisteminin dayanıqlığının gücləndirilməsi əsas prioritetlərdəndir.
O qeyd edib ki, dövlət başçısının tapşırıqlarına uyğun olaraq elektroenergetika sahəsində aparılan islahatlar ənənəvi enerji potensialının qorunması ilə yanaşı, Azərbaycanın aşağı karbonlu və rəqəmsal enerji modelinə keçidinə də zəmin yaradır.
İdarə Heyətinin sədri ötən gün bir qrup energetikin Prezident İlham Əliyevin sərəncamları ilə təltif olunmasına xüsusi diqqət çəkib. Energetika işçilərinin əməyinə verilən yüksək qiymətin dövlət başçısının bu sahəyə göstərdiyi diqqət və qayğının bariz nümunəsi olduğunu bildirən Baba Rzayev çoxminlik energetiklər kollektivi adından əməyə verilən dəyərə görə ölkə rəhbərliyinə minnətdarlığını ifadə edib.
Tədbirdə çıxış edən digər natiqlər də son illərdə Azərbaycanın enerji sistemində həyata keçirilən kompleks tədbirlərdən, infrastrukturun yenilənməsindən, innovativ texnologiyaların tətbiqindən və əldə olunan nəticələrdən bəhs ediblər. Qeyd olunub ki, energetika sahəsində görülən işlər ölkənin enerji təhlükəsizliyinin möhkəmləndirilməsinə, sistemin etibarlılığının artırılmasına və gələcək inkişaf hədəflərinin reallaşdırılmasına xidmət edir.
Tədbirin sonunda energetika sahəsində uzunmüddətli və səmərəli fəaliyyətlərinə, yüksək peşəkarlıqlarına və “AzərEnerji” ASC-nin inkişafına verdikləri töhfələrə görə bir qrup əməkdaşa xüsusi plaketlər təqdim olunub.
Ən son xəbərləri səhifəmizdən də izləyin
