https://innews.az/uploads/news/2026-10/_innews_7fe3fe8aaff923b01ed147b3b_o.jpg
Buxarada keçirilən “Azərbaycan Mədəniyyəti: Ədəbiyyat və Sənət Həftəsi” çərçivəsində Özbəkistandakı Heydər Əliyev adına Azərbaycan Mədəniyyət Mərkəzinin “Xarıbülbül” teatr truppası tərəfindən dahi Azərbaycan bəstəkarı Üzeyir Hacıbəylinin dünya şöhrətli “Arşın mal alan” operettası nümayiş etdirilib.
Buxara Dövlət Universitetində təşkil olunan tədbirdə Buxaranın ictimaiyyət nümayəndələri, universitetin rəhbərliyi, professor-müəllim heyəti və tələbələr iştirak ediblər.
Tədbirin açılışında çıxış edən Özbəkistandakı Heydər Əliyev adına Azərbaycan Mədəniyyət Mərkəzinin direktoru, tarix üzrə fəlsəfə doktoru
Akif Marifli xalqlarımız arasında əsrlər boyu formalaşmış dostluq və qardaşlıq münasibətlərinin hazırkı dövrdə cənab prezidentlərimizin qətiyyətli siyasi iradəsi və birgə səyləri nəticəsində ən yüksək səviyyəyə yüksələrək əbədi dostluq və strateji müttəfiqlik münasibətlərinə çatdığını bildirib. O, ölkələrimiz arasında mövcud münasibətlərin mədəni-humanitar əməkdaşlığın və mədəni diplomatiyanın inkişafı üçün də geniş imkanlar yaratdığını vurğulayıb.
Akif Marifli qeyd edib ki, Heydər Əliyev adına Azərbaycan Mədəniyyət Mərkəzi tərəfindən Azərbaycan mədəniyyətinin, ədəbiyyatının və incəsənətinin Özbəkistanda tanıdılması istiqamətində ardıcıl layihələr həyata keçirilir və bu cür mədəni layihələr gələcəkdə də davam etdirilərək ölkənin müxtəlif regionlarında daha geniş auditoriyalara təqdim olunacaqdır. O, Mərkəzin nəzdində fəaliyyət göstərən “Xarıbülbül” Teatr Truppasının Azərbaycan dramaturgiyasının müxtəlif janrlarına aid səhnə əsərlərini Özbəkistan tamaşaçılarına təqdim etdiyini, bu fəaliyyətin iki qardaş xalq arasında mədəni əlaqələrin daha da zənginləşməsinə xidmət etdiyini bildirib.
Tədbirdə çıxış edən Buxara Dövlət Universitetinin rektoru Obidjon Hamidov Azərbaycan və Özbəkistan arasında çoxəsrlik dostluq və qardaşlıq münasibətlərindən bəhs edərək, bu cür mədəni tədbirlərin xalqlarımızın bir-birinin zəngin ədəbi və mədəni irsini daha yaxından tanıması baxımından mühüm əhəmiyyət daşıdığını bildirib. Rektor “Arşın mal alan” operettasının Buxara Dövlət Universitetində nümayişinin təşkilinə görə Heydər Əliyev adına Azərbaycan Mədəniyyət Mərkəzinin rəhbərliyinə təşəkkürünü ifadə edib.
Daha sonra “Xarıbülbül” Teatr Truppasının ifasında Üzeyir Hacıbəylinin Azərbaycan musiqili teatr sənətinin şah əsərlərindən biri olan “Arşın mal alan” operettası nümayiş etdirilib. Milli musiqi ənənələrini, zəngin yumoru və maraqlı süjet xəttini özündə birləşdirən tamaşa iştirakçılara xoş ovqat bəxş edib və tamaşaçılar tərəfindən böyük maraqla qarşılanıb.
Ən son xəbərləri səhifəmizdən də izləyin
