https://innews.az/uploads/news/2026-10/_innews_9dc3efd07aeec44f56a79da0e_o.jpg
Müasir dünyada narkomaniya və psixatrop vasitələrin qeyri-qanuni dövriyyəsi insanların üzləşdiyi ən ciddi social təhlükəsizlik problemlərindən biridir. Cəmiyyətin sağlamlığına, ailə institutuna, gənclərin gələcəyinə və dövlətlərin milli təhlükəsizliyinə mənfi təsir göstərən bu təhlükə ilə mübarizə yalnız hüquq-mühafizə qrumlarının deyil, ümmdə cəmiyyətin qarşısında duran mühüm prioritetdir. Narkotik asılılığı insan sağlamlığını və sosial həyatını təhlükə altına salmaqla yanaşı, cinayətkarlığın artmasına, sosial münasibətlərin zəifləməsinə və ictimai rifahın pozulmasına da səbəb ola bilər. Xüsusilə yeniyetmələr və gənclər arasında narkotik vasitələrin istifadəsinin qarşısının alınması mühüm əhəmiyyət daşıyır. Maraq, sosial təzyiq və psixoloji çətinliklər nəticəsində atılan kor-koranə addımlar ağır asılılıq problemlərinə gətirib çıxara bilər. Narkotik vasitələrdən istifadə insanın fiziki və psixoloji sağlamlığına ciddi zərər vurur, inyeksiya yolu ilə istifadə zamanı isə HİV və hepatit C kimi infeksiyaların ötürülməsi riskini artırır. Buna görə də sağlam həyatın təşviqi, maarifləndirmə, erkən profilaktika və reabilitasiya tədbirləri narkomaniyaya qarşı mübarizənin əsas istiqamətləri olmalıdır.
Azərbaycanda narkomanlığa və psixatrop vasitələrin qanunsuz dövriyyəsinə qarşı mübarizə uzunmüddətli dövlət siyasətinin mühüm istiqamətlərindən biridir. Bu sahədə institusional mübarizənin əsasını Ümummilli Lider Heydər Əliyevin 26 avqust 1996-cı il tarixli fərmanı ilə yaradılmış xüsusi Dövlət Komissiyası qoymuşdur. Sonrakı illərdə qəbul edilən dövlət proqramları narkotik vasitələrin qanunsuz dövriyyəsinin qarşısının alınması, hüquqi mexanizmlərin təkmilləşdirilməsi və ictimai maarifləndirmənin genişləndirilməsi üçün mühüm zəmin yaratmışdır.Prezident İlham Əliyevin rəhbərliyi dövründə bu siyasətin davamlılığının təmin edilməsi məqsədilə ardıcıl dövlət proqramları təsdiq edilmişdir. 24 iyun 2013-cü il tarixli sərəncamla 2013–2018-ci illər üçün, 22 iyul 2019-cu il tarixli sərəncamla isə 2019–2024-cü illər üçün Dövlət proqramları qəbul olunmuşdur. Daha sonra, 17 sentyabr 2025-ci il tarixli sərəncamla 2025–2030-cu illər üçün Dövlət Proqramı təsdiqlənmişdir. Yeni proqram narkotik vasitələrin, psixotrop maddələrin və prekursorların qanunsuz dövriyyəsinə qarşı mübarizənin gücləndirilməsini, aidiyyəti qurumların fəaliyyətinin əlaqələndirilməsini, müalicə və reabilitasiya imkanlarının təkmilləşdirilməsini, eləcə də profilaktika və maarifləndirmə tədbirlərinin davamlılığını hədəfləyir. Bu qərarlar narkomaniya ilə mübarizənin dövlət siyasətində ardıcıl şəkildə prioritet olaraq saxlanıldığını göstərir
Digər mühüm istiqamət narkotik vasitələrin və psixotrop maddələrin qaçaqmalçılıq yolu ilə ölkəyə gətirilməsinin, ölkə ərazisindən qanunsuz tranzitinin və satışının qarşısının alınmasıdır. Azərbaycan Respublikasının müvafiq dövlət qurumları, o cümlədən Daxili İşlər Nazirliyi, Dövlət təhlükəsizlik Xidməti, Dövlət Gömrük Komitəsi və Dövlət Sərhəd Xidməti bu istiqamətdə öz səlahiyyətləri çərçivəsində fəaliyyət göstərirlər. O cümlədən Səhiyyə Nazirliyi tərəfindən tibbi profilaktit tədbirlər həyata keçirilir. QHT-lərə Dövlət Agentliyi tərəfindən uzun illərdir ki, qrant maliyyələşməsi ilə QHT-lər uğurlu maarifləndirici tədbirlər həyayat keçirir. Təşkilatımız da bu istiqmətdə maarifləndirici tədbirlər reallaşdırıb. Bununla yanaşı, Azərbaycanın beynəlxalq tərəfdaşlarla əməkdaşlığı, məlumat mübadiləsi və beynəlxalq hüquqi mexanizmlərdə iştirakı transmilli narkotik qaçaqmalçılığına qarşı mübarizənin əhəmiyyətli tərkib hissəsidir.
Nəticə etibarilə, narkomaniyaya və narkotik vasitələrin qanunsuz dövriyyəsinə qarşı mübarizə dövlətin, cəmiyyətin və hər bir vətəndaşın ortaq məsuliyyətidir. Azərbaycanın bu istiqamətdə həyata keçirdiyi dövlət proqramları,tədbirlər silsilələri və beynəlxalq əməkdaşlıq səyləri təhlükənin qarşısının alınmasına yönəlmiş kompleks yanaşmanın əsasını təşkil edir. Bununla belə, davamlı nəticələr əldə etmək üçün hüquqi tədbirlərlə yanaşı, maarifləndirmə, profilaktika və reabilitasiya istiqamətlərinə də xüsusi diqqət yetirilməlidir. Narkotik vasitələrdən uzaq durmaq, sağlam həyat tərzini seçmək və gələcək nəsillərin təhlükəsizliyini qorumaq daha sağlam, güclü və təhlükəsiz cəmiyyət quruculuğunun vacib şərtidir. Ağ ölümə qarşı mübarizə gələcəyimizi qorumaq naminə hamımızın üzərinə düşən məsuliyyətdir.
Ən son xəbərləri səhifəmizdən də izləyin
