https://innews.az/uploads/news/2026-10/_innews_df48005c2180c65a5bf8669e3_o.jpg
- 2027-ci il üzrə MICHELIN Guide Türkiyə seçimi İstanbulda, Divan Kuruçeşme məkanında keçiriləcək mərasimdə təqdim olunacaq.
- İlk dəfə olaraq MICHELIN Guide Türkiyə ölkənin qastronomiya mənzərəsini ümummilli miqyasda əhatə edəcək.
- MICHELIN Guide müfəttişləri ölkə üzrə araşdırmalarını davam etdirərək həm köklü kulinariya ənənələrini yaşadan məkanları, həm də yeni yaranan qastronomiya ünvanlarını kəşf edirlər.
Michelin şirkəti 2027-ci il üzrə MICHELIN Guide Türkiyənin ümummilli seçiminin 3 dekabr 2026-cı il, cümə axşamı günü İstanbulda, Divan Kuruçeşme məkanında keçiriləcək mərasimdə açıqlanacağını elan edib.
Bələdçinin ölkə üzrə əhatə dairəsinin mərhələli şəkildə genişlənməsinin davamı olan tədbirdə MICHELIN Guide Türkiyənin ilk ümummilli seçiminə daxil edilən bütün restoranlar təqdim olunacaq.
Mərasim çərçivəsində qonaqpərvərlik sahəsinin peşəkarlarını və kulinariya istedadlarını fərqləndirən bir sıra xüsusi mükafatlar da təqdim ediləcək.
MICHELIN Guide 2022-ci ildə ilk dəfə İstanbulda təqdim olunduqdan və sonradan İzmir, Muğla və Kapadokya kimi istiqamətləri əhatə etməyə başladıqdan sonra bələdçinin müfəttişləri Türkiyənin kulinariya kimliyini daha dərindən öyrənməyə davam ediblər. Qarşıdakı ümummilli seçim mühüm mərhələ olmaqla, ölkənin müxtəlif bölgələrindəki qastronomiya təcrübələrinin zənginliyini, rəngarəngliyini və dinamik inkişafını daha geniş auditoriyaya təqdim etməyə imkan verəcək.
MICHELIN Guide-nin beynəlxalq direktoru Gwendal Poullennec açıqlamasında bildirib:
“Türkiyədə fəaliyyətə başladığımız ilk gündən bu ölkənin qeyri-adi kulinariya zənginliyi bizi daim heyran edib. Dərin köklərə malik regional ənənələrdən müasir qastronomiya nümunələrinə qədər Türkiyə böyük müxtəliflik və yaradıcılıq təqdim edir. Müfəttişlərimiz ölkə üzrə səfərlərini davam etdirdikcə yeni və diqqətəlayiq restoranları, eləcə də kulinariya istedadlarını kəşf etmək həvəslərini qoruyurlar. MICHELIN Guide Türkiyənin ilk ümummilli seçimi bu müxtəlifliyi nümayiş etdirməyə və səyahətçilərə Türkiyənin aparıcı qastronomiya istiqamətlərindən biri kimi daha geniş mənzərəsini təqdim etməyə imkan verəcək”.
2027-ci il üzrə MICHELIN Guide Türkiyənin ümummilli seçiminə ilk dəfə daxil olan restoranların aşpazları, eləcə də MICHELIN ulduzlarına layiq görülən restoranların nümayəndələri əldə etdikləri nailiyyətləri qeyd etmək üçün mərasimdə bir araya gələcəklər.
Tədbirdən dərhal sonra 2027-ci il üzrə MICHELIN Guide Türkiyənin tam seçimi bələdçinin rəsmi internet saytında və mobil tətbiqində əlçatan olacaq.
MICHELIN Guide-ın qiymətləndirmə metodologiyası
MICHELIN Guide 1900-cü ildə Michelin şin şirkəti tərəfindən avtomobillə səyahətin inkişafına dəstək məqsədilə yaradılıb. O vaxtdan bəri bələdçi ilkin missiyasına sadiq qalaraq səyahətçiləri ən yaxşı restoranlara yönləndirməyi, seçilən kulinariya məkanlarını tanıtmağı və dünya üzrə səyahət mədəniyyətini təşviq etməyi qarşısına məqsəd qoyub.
Restoranlar yalnız mətbəxin keyfiyyətinə əsaslanan beş universal meyar üzrə qiymətləndirilir:
MICHELIN Guide seçimə daxil edilən restoranları yalnız kulinariya keyfiyyətinə əsasən müəyyənləşdirir. Qiymətləndirmələr dünyanın müxtəlif ölkələrində eyni metodologiyanı tətbiq edən, kimliklərini açıqlamayan müstəqil müfəttişlər tərəfindən aparılır.
Restoran seçimi ilə yanaşı, MICHELIN Guide Türkiyədə və dünyanın digər ölkələrində seçilmiş hotelləri də təqdim edir. Bu hotellər arasından ən fərqlənənləri MICHELIN Keys mükafatına layiq görülür. Restoranlara verilən MICHELIN ulduzları ilə eyni yanaşma əsasında təqdim olunan bu mükafat hotelləri dizaynı, memarlığı, xidmət səviyyəsi və özünəməxsus xarakteri ilə qonaqlara müstəsna qalma təcrübəsi yaşatdıqlarına görə fərqləndirir. Bütün hotelləri birbaşa MICHELIN Guide-ın rəsmi internet saytı və mobil tətbiqi vasitəsilə bron etmək mümkündür.
Ən son xəbərləri səhifəmizdən də izləyin
