https://innews.az/uploads/news/2026-10/_innews_44ec4497fe2f0d8dde5d38f14_o.jpg
30 oktyabr tarixində Azərbaycan Bəstəkarlar İttifaqı və Azərbaycan Yazıçılar Birliyinin birgə layihəsi çərçivəsində “Qələmdən – Notlara: Uşaq Mahnıları” mövzusunda konsert proqramı baş tutub.
Tədbir haqqında "innews media" saytına açıqlama verən Azərbaycan Bəstəkarlar İttifaqının mətbuat katibi Aysel Kərim bildirib:
“Mən çox şadam ki, üzvü olduğum hər iki qurum — Azərbaycan Bəstəkarlar İttifaqı və Azərbaycan Yazıçılar Birliyi belə maraqlı bir layihəni həyata keçirir. Uşaq ədəbiyyatı və uşaq musiqisi hər bir xalqın gələcəyə atdığı ən möhkəm mənəvi təməldir. Bu gün sözlə musiqinin belə ülvi vəhdəti uşaqların bədii-estetik tərbiyəsində, onların milli ruha köklənmiş mahnılarla böyüməsində müstəsna rol oynayır. İnanırıq ki, bu gün səslənən hər bir mahnı azyaşlı dinləyicilərin və tədbir iştirakçılarının qəlbində unudulmaz iz buraxacaq, gələcək yaradıcılıq addımlarına işıq saçacaqdır”.
Mətbuat katibi Aysel Kərim vurğulayıb ki, tədbiri giriş sözü ilə Azərbaycan Bəstəkarlar İttifaqının sədri, AMEA-nın müxbir üzvü, Xalq artisti, professor Firəngiz Əlizadə açaraq layihənin mənəvi mahiyyətini diqqətə çatdırıb.
Tədbirdə çıxış edən AYB-nin “Uşaq ədəbiyyatı” şöbəsinin rəhbəri Q. Nəcəfzadə Azərbaycan Yazıçılar Birliyinin sədri, Xalq yazıçısı Anar müəllimin müəyyən səbəblərdən tədbirdə şəxsən iştirak edə bilmədiyini diqqətə çatdıraraq, onun səmimi salamlarını və təbrik sözlərini iştirakçılara çatdırıb. Daha sonra ABİ-nin “Uşaq və yeniyetmələr üçün musiqi və estetik tərbiyə” bölməsinin sədri İ. Əfəndiyevanın və AYB-nin “Uşaq poeziyası” şöbəsinin heyət üzvü M. U. Şirvanlının çıxışları dinlənilib.
Konsert proqramı çərçivəsində gənc və istedadlı ifaçıların təqdimatında rəngarəng musiqi nömrələri maraqla qarşılanıb. Proqramda S. Rəhimovanın Ş. Musaoğlunun sözlərinə bəstələdiyi “Can, Azərbaycandır”, R. Qədimovanın M. U. Şirvanlının sözlərinə bəstələdiyi “At gəlir, murad gəlir”, Ü. Məmmədovun A. Səhhətin sözlərinə bəstələdiyi “Köç” İ. Qismətin M. U. Şirvanlının sözlərinə bəstələdiyi “Gözəl qaz”,
S.Əliyeva-Qəmbərovanın R. Qusarçayın sözlərinə bəstələdiyi “Azərbaycan bayrağı”, L. Əhmədovanın R. Kərimlinin sözlərinə bəstələdiyi “Ucaldaq Vətəni” , S. İbrahimovanın “Nağıllardan gələn qızın uşaq dünyası” uşaq mahnıları məcmuəsindən öz sözlərinə bəstələdiyi “Şən karusel” və “Kitabı sevək” mahnıları
Proqramın sonunda S. Məmmədlinin öz sözlərinə bəstələdiyi “Əziz müəllim”, M. Əhmədovanın F. Qocanın sözlərinə bəstələdiyi “Sərhədçilər mahnısı”- təqdim olunub.
Ən son xəbərləri səhifəmizdən də izləyin
