https://innews.az/uploads/news/2026-11/_innews_5c8dbdf2ef82d4d4cc29f265b_o.jpg
8 Noyabr – Zəfər Günü münasibətilə Azərbaycan Dövlət Pedaqoji Universitetinin (ADPU) Kimya və biologiya fakültəsində tədbir keçirilib.
Tədbirdə fakültənin dekanı dosent Reyhan Ağayeva, dekan müavinləri dosent Bəsti Əsədova və dosent Kərim Quliyev, fakültənin professor-müəllim heyəti, əməkdaşları və tələbələri iştirak ediblər.
Tədbir Azərbaycan Respublikasının ərazi bütövlüyü və suverenliyi uğrunda canlarından keçmiş şəhidlərin əziz xatirəsinin bir dəqiqəlik sükutla yad edilməsi və Dövlət Himninin səsləndirilməsi ilə başlayıb.
Aparıcılar çıxışlarında 8 Noyabr – Zəfər Gününün tarixi əhəmiyyətindən bəhs edərək 2020-ci il sentyabrın 27-də başlayan və 44 gün davam edən Vətən müharibəsinin Azərbaycan xalqının qəhrəmanlıq salnaməsində müstəsna yer tutduğunu vurğulayıblar. Qeyd olunub ki, bu tarixi qələbə xalqımızın milli birliyinin, ordumuzun gücünün və əsgərlərimizin misilsiz şücaətinin təntənəsidir.
Tədbirdə tələbələr Vətənə, qəhrəman əsgərlərimizə və şəhidlərimizin əziz xatirəsinə həsr olunmuş şeirlər səsləndiriblər.
Qonaq qismində iştirak edən qazilər – Rüfət Salmanov və Aydın Cavadov Vətən müharibəsi zamanı yaşadıqları döyüş xatirələrini bölüşüb, gənclərlə öz təcrübələrini bölüşərək vətənpərvərlik, milli dəyərlərə bağlılıq və Vətən qarşısında məsuliyyət hissinin əhəmiyyətini vurğulayıblar.
Daha sonra 44 günlük Vətən müharibəsinə həsr olunmuş videoçarx nümayiş etdirilib.
Fakültənin dekanı dosent Reyhan Ağayeva çıxışında Zəfər Gününün Azərbaycan xalqının tarixində mühüm əhəmiyyət daşıdığını qeyd edib. O, 44 günlük Vətən müharibəsində qazanılan tarixi qələbənin xalqımızın sarsılmaz birliyinin, milli həmrəyliyinin və Azərbaycan Ordusunun gücünün təcəssümü olduğunu bildirib. Dekan şəhidlərimizin Vətən uğrunda göstərdikləri fədakarlığın heç zaman unudulmayacağını, qazilərimizin qəhrəmanlığının isə gənc nəsil üçün örnək olduğunu vurğulayıb. Reyhan Ağayeva tələbələrin milli-mənəvi dəyərlərə bağlı, Vətəninə və xalqına sadiq, tarixini dərindən bilən vətəndaşlar kimi yetişməsinin əhəmiyyətini qeyd edib.
Ən son xəbərləri səhifəmizdən də izləyin
