https://innews.az/uploads/news/2026-11/_innews_212da43b2b2108b6733d7a492_o.jpg
Litva–Azərbaycan və Avropa İttifaqı–Azərbaycan münasibətlərini möhkəmləndirmək üçün yaranmış yeni imkandan necə istifadə edə bilərik?
"innews media" xəbər verir ki, noyabrın 5–6-da Vilnüsdə keçirilən iki günlük məhsuldar görüşlərin əsas müzakirə mövzusu məhz bu olub. Həmin günlərdə Azərbaycanın Prezidentinin xüsusi tapşırıqlar üzrə nümayəndəsi Elçin Əmirbəyov Litvada səfərdə olub.
Elçin Əmirbəyovla görüşündə Litvanın xarici işlər naziri Kestutis Budris ikitərəfli münasibətlərin möhkəmləndirilməsi istiqamətində qarşılıqlı istəkləri, Litvanın Avropa İttifaqı Şurasına qarşıdakı sədrliyi dövründə Aİ–Azərbaycan gündəliyinin inkişaf etdirilməsi imkanlarını, eləcə də Azərbaycan və Ermənistan arasında sülh prosesində müşahidə olunan müsbət dinamikanı müzakirə edib.
Litva diplomatiyasının rəhbəri bildirib: “Avropa İttifaqı Şurasına sədrliyimiz dövründə Litva Azərbaycanla enerji, bağlantılar və ticarət sahələrində əməkdaşlığı gücləndirməyə çalışacaq. Brüssel və Bakı arasında daha sıx əlaqələri təmin etməklə, Cənubi Qafqaz regionunun daha təhlükəsiz və firavan olmasına töhfə verəcəyik”.
Görüş zamanı Rusiyanın regiondakı fəaliyyəti və xüsusilə qarşıdan gələn qış mövsümündə Ukraynaya dəstəyin artırılmasının zəruriliyi də müzakirə olunub.
Elçin Əmirbəyov Vilnüsdə, həmçinin Litva Hökumətinin kansleri Tomas Daukantas, xarici işlər nazirinin müavini Kristupas Vaytiekunas və Prezidentin xarici siyasət məsələləri üzrə baş müşaviri Asta Skaisgirite ilə görüşlər keçirib.
Litva Seymində isə vitse-spikerin birinci müavini Domas Qrişkeviçius, Azərbaycanla parlamentlərarası əlaqələr üzrə parlament qrupunun sədr müavini Algirdas Butkeviçius, eləcə də Seymin Milli Təhlükəsizlik və Müdafiə Komitəsi sədrinin müavini Laurynas Kaşçunas ilə görüşlər baş tutub.
Proqram çərçivəsində Baş nazirin beynəlxalq əlaqələr üzrə müşaviri Violeta Podagelite ilə görüş, İşğal və Azadlıq Mübarizələri Muzeyinə ziyarət də nəzərdə tutulub. Elçin Əmirbəyov, həmçinin Geosiyasət və Təhlükəsizlik Araşdırmaları Mərkəzində (analitik mərkəz) ekspertlərlə fikir mübadiləsi aparıb.
Vilnüsdə keçirilən görüşlərdə diqqət yalnız siyasi dialoqun gücləndirilməsinə deyil, həm də ikitərəfli gündəliyə praktiki fayda gətirəcək birgə səylərə yönəlib. Bu çərçivədə enerji, nəqliyyat əlaqələri, logistika, kənd təsərrüfatı, rəqəmsal texnologiyalar və ticarət sahələrində əməkdaşlıq imkanlarının araşdırılması, eləcə də tarixi yaddaşa daha çox diqqət yetirilməsi məsələləri müzakirə olunub.
Tərəflər, həmçinin hər iki regiondakı təhlükəsizlik vəziyyəti, Azərbaycan və Ermənistan arasında sülh gündəliyi, o cümlədən regional bağlantıların və iqtisadi əməkdaşlığın Cənubi Qafqazda və onun hüdudlarından kənarda uzunmüddətli və dayanıqlı sülhün, sabitliyin möhkəmləndirilməsində rolu ətrafında fikir mübadiləsi aparıblar.
Ən son xəbərləri səhifəmizdən də izləyin
