https://innews.az/uploads/news/2026-11/_innews_32f559cb6e069d53cc10820b4_o.jpg
Müasir beynəlxalq münasibətlər sistemində baş verən geosiyasi dəyişikliklər dövlətləri xarici siyasət prioritetlərini yenidən nəzərdən keçirməyə, yeni tərəfdaşlıqlar qurmağa və iqtisadi əlaqələrin coğrafiyasını genişləndirməyə sövq edir. Belə bir şəraitdə Azərbaycanla Cənub-Şərqi Asiyanın dinamik inkişaf edən ölkələrindən biri olan Vyetnamın münasibətlərini strateji tərəfdaşlıq səviyyəsinə yüksəltməsi xüsusi siyasi və iqtisadi əhəmiyyət daşıyır. Bu əməkdaşlıq təkcə ikitərəfli əlaqələrin inkişafı deyil, həm də Azərbaycanın Asiya istiqamətində xarici siyasət imkanlarının genişləndirilməsi baxımından mühüm addımdır.
Bu sözləri "innews media" açıqlamasında Milli Məclisin deputatı Nurlan Həsənov söyləyib.
O qeyd edib ki, Azərbaycanın xarici siyasət strategiyasının əsas xüsusiyyətlərindən biri müxtəlif regionlarla qarşılıqlı faydalı əməkdaşlıq münasibətlərinin qurulması, beynəlxalq tərəfdaşlıq şəbəkəsinin genişləndirilməsi və milli maraqlara uyğun yeni iqtisadi imkanların yaradılmasıdır: “Bu baxımdan Vyetnamla münasibətlər xüsusi perspektiv vəd edir. Sürətli iqtisadi inkişafı, sənaye potensialı, geniş istehsal imkanları və beynəlxalq ticarətdə artan çəkisi ilə seçilən Vyetnam Azərbaycanın Cənub-Şərqi Asiya bazarlarına çıxışı üçün mühüm tərəfdaşdır. Azərbaycan isə öz növbəsində Avropa ilə Asiya arasında yerləşən strateji coğrafi mövqeyi, enerji resursları və inkişaf etmiş nəqliyyat infrastrukturu ilə Vyetnam üçün cəlbedici əməkdaşlıq imkanları təqdim edir”.
"2025-ci ilin mayında Vyetnam Kommunist Partiyasının Baş katibi To Lamın Azərbaycana dövlət səfəri və Strateji tərəfdaşlığın qurulması haqqında Birgə Bəyanatın imzalanması münasibətlərdə yeni siyasi mərhələnin başlanğıcı oldu. Bu sənəd iki ölkənin əməkdaşlığı daha konkret istiqamətlər üzrə inkişaf etdirmək, mövcud potensialı real layihələrə çevirmək və qarşılıqlı iqtisadi maraqları uzlaşdırmaq niyyətini ortaya qoydu. Ardınca hökumətlərarası və biznes platformalarında keçirilən görüşlər strateji tərəfdaşlığın praktiki məzmunla zənginləşdirilməsi istiqamətində mühüm addımlara çevrildi.
Əməkdaşlığın ən perspektivli istiqamətlərindən biri enerji sektorudur. Azərbaycan uzun illər ərzində formalaşdırdığı neft-qaz təcrübəsi, enerji infrastrukturu və beynəlxalq bazarlara çıxış imkanları ilə Vyetnam üçün əhəmiyyətli tərəfdaş ola bilər. SOCAR və “PetroVietnam” arasında imzalanmış Anlaşma Memorandumu bu sahədə yeni əməkdaşlıq imkanlarının yaranmasına xidmət edir. Burada söhbət yalnız neft-qaz hasilatından deyil, həm də kəşfiyyat, texnologiya mübadiləsi, kadr hazırlığı və birgə investisiya layihələrindən gedir. Eyni zamanda, qlobal enerji keçidinin sürətləndiyi bir dövrdə bərpaolunan enerji sahəsində əməkdaşlıq iki ölkənin gələcək iqtisadi prioritetlərini uzlaşdırmaq baxımından xüsusi əhəmiyyət kəsb edir.
Azərbaycan–Vyetnam münasibətlərinin digər mühüm istiqaməti nəqliyyat və logistika sahəsidir. Hazırda beynəlxalq ticarət marşrutlarının şaxələndirilməsi, təchizat zəncirlərinin təhlükəsizliyi və alternativ nəqliyyat dəhlizlərinin inkişafı qlobal iqtisadiyyatın əsas məsələlərindəndir. Azərbaycanın fəal iştirakçısı olduğu Orta Dəhliz Vyetnam məhsullarının Avropa bazarlarına çatdırılması, eyni zamanda, Azərbaycan vasitəsilə yeni ticarət əlaqələrinin qurulması üçün əlverişli imkanlar yaradır. Bu əməkdaşlıq Azərbaycanın tranzit ölkə statusunu gücləndirməklə yanaşı, Vyetnam şirkətlərinin Avrasiya məkanında fəaliyyət coğrafiyasını genişləndirə bilər", - deyə N. Həsənov vurğulayıb.
O əlavə edib ki, siyasi münasibətlərin inkişafında beynəlxalq təşkilatlar çərçivəsində əməkdaşlıq da xüsusi yer tutur: “BMT, Qoşulmama Hərəkatı və Asiyada Qarşılıqlı Fəaliyyət və Etimad Tədbirləri üzrə Müşavirə kimi platformalarda qarşılıqlı dəstək iki ölkənin beynəlxalq məsələlərə dair dialoqunu gücləndirir. Azərbaycanın Vyetnamın Cənub-Şərqi Asiya Dövlətləri Assosiasiyası (ASEAN) məkanında regional əməkdaşlığın genişləndirilməsinə töhfə vermək imkanlarına marağı da bu baxımdan diqqətəlayiqdir. Bu baxımdan Bakı–Hanoy münasibətləri ikitərəfli çərçivədən çıxaraq daha geniş regional əməkdaşlıq perspektivi qazanır”.
Ən son xəbərləri səhifəmizdən də izləyin