https://innews.az/uploads/news/2022-11/_innews_d26f558b1064f847f7db37d5a_o.jpg
ADA Universiteti nəzdində fəaliyyət göstərən İnkişaf və Diplomatiya İnstitutunun ("IDD") İxtisasartırma Proqramları tərəfindən təşkil edilən “Xəzər Hövzəsi Araşdırmaları” Proqramı öz fəaliyyətinə başlayıb.
Proqramda xarici diplomatlar və dövlət qulluqçuları, beyin mərkəzlərinin və diplomatik institutların nümayəndələri iştirak edirlər. 17 ölkəni təmsil edən 30-dək iştirakçı birhəftəlik Proqram vasitəsilə Xəzər regionu ilə yaxından tanış olacaqlar. Həmin ölkələr sırasında Argentina, Belçika, Böyük Britaniya, Braziliya, Gürcüstan, İsrail, İtaliya, Qazaxıstan, Qırğızıstan, Malayziya, Meksika, Özbəkistan, Pakistan, Polşa, Rumıniya, Türkiyə, Ukraynanı qeyd etmək mümkündür.
Proqramın noyabrın 28-i baş tutan Açılış mərasimində ADA Universitetinin prorektoru və İnkişaf və Diplomatiya İnstitutunun direktoru Fariz İsmayılzadə çıxış edərək “Xəzər Hövzəsi Araşdırmaları”nın yaranma tarixindən, ölkəmizin siyasi, iqtisadi mövqeyi barədə məlumatın artırılmasındakı və beynəlxalq ictimaiyyət üzvləri arasında şəbəkələşməni dəstəkləməsindəki rolundan bəhs edib.
ADA Universitetinin Dövlət, xarici və tələbə işləri üzrə prorektorunun müşaviri, İnkişaf və Diplomatiya İnstitutunun direktor müavini Aygün Hacıyeva çıxışında "IDD"nin siyasi araşdırma və təhlilin, eləcə də intellektual müzakirələrin aparıldığı regional mərkəzə çevrilmək, həmçinin istedadlar yetişdirmək və ölkəmizin beynəlxalq təbliğinə dəstək olmaq istiqamətindəki missiya və məqsədlərinə toxunub.
İnkişaf və Diplomatiya İnstitutunun İxtisasartırma Proqramlarının rəhbəri Nərgiz İsmayılova Proqramın 15 ildən çox müddət ərzində əldə etdiyi uğurlardan söhbət açaraq onun dövlət və özəl sektorun, yerli və beynəlxalq qurumların nümayəndələrini bir araya gətirdiyini, onlar arasında dialoqu təmin etdiyini diqqətə çatdırıb.
Qeyd edək ki, Proqram çərçivəsində Xəzər regionun tarixi, geostrateji mövqeyi və iqtisadi imkanları barədə mühazirələr veriləcək. Bununla yanaşı, çıxışçılar tərəfindən iştirakçılara Azərbaycanın tarixi, mədəniyyəti, inkişaf strategiyası, regiondakı mövqeyi, qonşu ölkələrlə ikitərəfli münasibətlərinə dair məlumat ötürüləcək. Onların ölkəmizlə bağlı hərtərəfli məlumat əldə etmələri üçün müxtəlif muzey və mədəni tarixi məkanlara ziyarəti, Azərbaycan Respublikasının Xarici İşlər nazirliyinə və Bakı Limanına, həmçinin işğaldan azad edilmiş ərazilərimizin inkişafını yerində müşahidə etmələri üçün Ağdam şəhərinə səfərləri təşkil ediləcək.
Proqram çərçivəsində Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev, ADA Universitetinin prorektoru Fariz İsmayılzadə, Universitetin İnstitusional Effektivlik və İnkişaf üzrə prorektoru Elkin Nurməmmədov və Kommunikasiya və Rəqəmsal media proqramının direktoru Şəfəq Mehrəliyeva mühazirələrlə çıxış edəcəklər.
Proqram Beynəlxalq Münasibətlərin Təhlili Mərkəzinin İdarə Heyətinin üzvü Esmira Cəfərova və “BP Azerbaijan”nın Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəylinin mühazirələri ilə davam edəcək.
Həmçinin "IDD"nin Tədqiqat, Analiz və Nəşrlər üzrə proqramının direktoru Damyan Krineviç Mişkoviç və Eneji və Davamlı İnkişaf proqramının direktoru Əhməd Hümbətov xarici ekspertləri maraqlandıran mövzular ətrafında çıxış edəcəklər.
Ən son xəbərləri səhifəmizdən də izləyin
